Intawon, sunod!

Makapahiubos! Samtang si Presidente Rodrigo R. Duterte puwerteng paningkamot nga masumpo ang kabangis sa Coronavirus Disease (COVID 19) nga mipahagba sa ekonomiya sa tibuok kalibotan ug mikutlo nag libolibo ka kinabuhi, aduna gihapoy mga oposisyonistang politiko, kinsa padayong misaway ning Enhanced Community Quarantine nga istrikto niyang gipatuman.

Sama sa gipagawas nga komentariyo ni Leni Robredo, kinsa miingon: “Paano po makakarating ang mga frontliners sa mga dapat nilang puntahan kung wala silang sasakyan? Paano ang mga empleyado ng mga drugstores o groceries? Paano madadala sa ospital ang mga nagpapakita ng sintomas kung wala silang sariling sasakyan? Nanawagan po tayo sa gobiyerno na linawin ang patakaran, o di kaya’y magbigay ng malinaw na alternatibo para sa mga nabanggit na  sector.”

Luyo sa kinasingkasing pangamuyo-hangyo ni Duterte sa tanang higanteng negosyante ug lider sa nasod, nga ipadaplin una ang pamolitika ug maoy tutokan ang panaghiusa ug pagtinabangay unsaon sa pagpakigkombati ning misteryosong COVID-19, gipakita hinuon ni Leni nga kunohay naluoy siya sa mga tawong nakasinatig kalisod sa pag-adto ug ngari sa dapit nga ilang adtoan.

Klaro kaayo nga ang tumong niya, mao ang paghatag og bato ngadto sa mga nahisgotang tawo, kang kansang tinipigang kasuko, gidagkotan ni Leni, aron inig dilaob, maglumbaanay paglabay og bato ngadto ni Duterte.

Nalimot si Leny, nga siyay bise presidente sa Pilipinas ug iyang obligasiyon ang pagtabang sa presidente nga mahatagag sakyanan ang giingon niyang mga frontliners, mga empleyado sa drugstores/groceries ug mga masakiton nga kinahanglag ihatod sa ospital. Mao kini hinungdan, nga didto sa Metro Manila, daghan lang gihapong lumolupyo ang pabiling gahig ulo.

Bisag gimandaran na ni Duterte nga adto paestaron sulod sa balay kay naay COVID-19, manggawas lang gihapon. Unyag badlongon sa polis, ang polis pay awayon. Unsaon, imbes moayuda si Leni sa mga pamaagi ni Duterte, pirme man gyod niyang kontrahon, uy!

Unta motabang si Leny pagpasabot sa katawhan, nga 14-21 days lang ang life cycle sa COVID-19. Ug mamatay lang kinig iyaha kon wala nay laing tawo nga kabalhinan.  Maoy rason nganong gi-enhanced community quarantine tag usa ka bulan.  Kini sumala pa, sa usa ka infectious doctor.

Busa, mga gahi, ayaw pagahigahi. Para man ni sa atong kaayohan. Intawon, sunod!