Saad wala matuman

Angay gyud nga ang kadagkoan sa Department of Engineering and Public Works (DEPW) o kaha ang Department of Public Works and Highways (DPWH) mosuperbisar gyud sa mga ongoing projects nga gidumala sa mga private contractor.

Nakabantay man gud ko nga dunay mga road concreting projects dinhi sa dakbayan nga pwerteng hinaya, ug ang uban mora’g gibiyaan usa sa mga contractor.

Usa niini mao ang road concreting project diha sa P. Burgos Street, gikan sa eskina V. Gullas paingon sa Cathedral Church.

Dugay na gyud nga wala nay nagtrabaho sa maong wala pa mahuman pagsemento nga karsada.

Ngano man kaha nga gibiyaan man sa contractor ang maong proyekto? Husto kaha ang ilang gihimo?

Kay wala man nila humana ang pagsemento, nakahasol kini sa mga motorista.

Sa karsada sab nga gikan sa Escario paingon sa Kalunasan, hinay kaayo ang pagtrabaho sa aseras, ug ang ubang bahin sa aseras duna usa lang gyud ka dangaw kapin ang gilapdon.

Unsaon paglakaw nianang aseras nga usa lang ka dangaw?

Dili kaha maayo nga ipatuman gyud nato ang balaod ug atong tibhangan ang kabalayan nga gitukod nga misaylo na sa luna nga gitagana para sa aseras?

Ang maong karsada diha sa Capitol Site ug Kalunasan, dako kaayo’g tabang nga momenos ang kahuot sa mga sakyanan nga moagi sa Escario Street paingon sa Gorordo Avenue.

Ang nakadaot lang kay kadtong mga sakyanan nga gikan sa sitio Sudlon ug paingon na unta sa Salinas Drive o JY Square, gidid-an nga maka-left turn sa Gorordo Avenue apan adto sila mo-U-Turn sa unahan bisan og walay U-Turn slot.

Ang maong dapit sa Gorordo eskina Sudlon, maoy giplanohan nga tukoran unta og flyover kaniadto, apan gibabagan ni kanhi mayor Michael Rama.

* * *

Apan taym pa gani, nakahinumdom ko nga sa paglingkod ni kanhi mayor Tomas Osme?a sa katungdanan niadtong 2016, gipahibalo niya nga magpatukod siya og labing menos 16 ka flyovers ug under pass dinhi sa siyudad.

Uy, nahuman na man lang diay ang tulo ka tuig nga termino ni Tommy ug wala man siya makapatukod og bisan usa ka flyover project sa siyudad?

Kadtong underpass dapit sa Mambaling, proyekto man kadto ni Kongresista Bebot Abellanosa ug dili kang Tommy.

Mora’g dinhing bahina, palpak si Tommy sa iyang gisaad ug nahimo siya nga bakakon niini.

Gipasalig ni Tommy kaniadto nga mangita kuno siya og budget gikan sa nasudnong kagamhanan aron matukod ang daghang flyover project nga makasulbad sa problema sa trapiko.

Apan wala kini matuman.