EDITORYAL - Wanted: Rail transit system para sa Sugbu

Kinahanglan na gyud dinhi sa Sugbu ang alternatibong modernong mass transport system tungod kay nagkadugay, nisamot na ang problema sa traffic sa mga kadalanan.

Kung obserbahan ang mga dalan dinhi sa Metro Cebu, duna gyuy mga dagkong karsada nga mag-bumper to bumper ang mga sakyanan.

Kini tungod kay bisan tuod  og nimenus na ang gidaghanon sa mga tradisyonal nga mga pasaheroan tungod sa modernisasyong gipatuman sa gobiyerno, gipulihan man sab kini og modern PUJs.

Apan dili lang kini, naa pay mga nagkalain-laing mga taksi, grab cars, black taxi, yellow taxi, ug uban pang pasaheroan sama sa mga motorsiklo nga gihimo na karong pasaheroan.

Gawas pa niana, naa nay daghang maka-afford og palit og sakyanan mao nga ang uban nagmaneho na og kaugalingon sakyanan ug nakapuno sab kini sa traffic. Ipuno pa kining mga sakyanang gigamit sa komersyo o negosyo.

Partikular nga mga oras nga magdasok ang mga sakyanan gikan sa alas 5:30 sa buntag hangtud na sa alas-9 ug gikan sa alas-3 sa hapon hangtud sa alas-7 sa gabii kay mao ni ang mga oras nga padung sa trabaho o eskuyla  ug mopauli ang mga tawo.

Kung walay laing alternatibong mass transport system nga dili moagi og karsada, dili gihapon masulbad kining traffic sa Sugbu ilabi na sa Metro Cebu sama sa Cebu City, Mandaue City, Lapu-Lapu City ug Talisay City.

Ang gikinahanglan sa Sugbu mao ang rail transport system kay kini dunay ekslusibong agianan o riles nga dili kinahanglang anha mosubay sa mga karsada. Pwede kaayong overhead o sa ibabaw ang riles ug pwede sab ipaagi og subway.

Nag-unang nagkinahanglan niini kining nahisgutang mga syudad kay paspas kaayo ang paglambo aning mga lugara.

Kun duna niini, makita sa mga tawo ang kaayohan sa pagsakay niini kun itandi sa pagsakay og tradisyonal nga mga pasaheroan sama sa bus, PUJs o bisan kanang taksi o motorcycle taxis, kay walay traffic ug diretso ra ug paspas ang biyahe.