Walay nasayud sa panahon ug takna

Nobiyembre 17, 2024: Ikakatloag-Tulo nga Dominggo sulod sa Tuig

Mga Pagbasa: Dn. 12;1-3/Sal. 16/Heb. 10;11-14,18/Mk. 13;24-32

Maayong Balita

Ang ebanghelyo nag-asoy sa pasidaan sa atong Ginoo ngadto sa iyang mga tinun-an ug kanila nga namati kaniya kalabot sa katapusan. Ang maong katapusan taliabot apan kun sa unsang paagi kini mahitabo ug kanus-a kini mahitabo, wala kitay kasayuran. Ang mahinungdanon maantigo kitang moabasa sa mga timaan sa panahon uban ang pagkamaigmaton.

Kasinatian

Daghan karon ang mga prepper communities sa tibuok kalibotan. Daghan ang nahimong stress kaayo labina kun maghisgot kita sa katapusan sa kalibotan. Dugang pa, daghan usab ang nanghadlok ug nagpatuyang og panagna nga walay igong basihan. Ang kalisang nga nasinati ug ang kataranta panahon sa taliabot nga katapusan sa kalibutan nagpasabot lamang nga daghan kanato ang dili andam. Daghan kanato ang mapasagaron diha sa atong pagwaldas sa panahon nga gipahulaman. Angay natong hinumdoman nga sa tanang panahon kita mangandam ug maglagsik kita sa pakig-atubang sa atong Dios sa adlaw unya sa paghukom.

Lihok

Ayaw kahadlok hinunoa himoang andam ang kaugalingon dili lamang sa mga butang kondili sa atong mga espirituhanong aspeto usab. Matud pa live as if you will die tomorrow.

Pangamuyo

Tanan: Dios ko! Himoa kaming andam ug tagana sa pagsanong sa imong kabubut-on ug wad-a ang dili makatarunganong kalisang nganhi kanimo. Pinaagi ni Kristo among Ginoo. Amen.