EDITORYAL - Ginikanan maoy basolon

Sa nagkagrabeng sitwasyon karon sa kabataan, daghan ang nakapangutana kung nakaapas ba ang sistema nato ug ang atong mga balaod sa panginahanglan sa mga kabataan para sa ilang kaayohan ug kaugmaon sa nasud?

Daghang ang mga nag-adbokasiya og maayong pagpadako sa mga bata pinaagi sa mga proteksyon sa balaod, apan daghan sab ang  wala nakasabot aning mga balaora kay  sobra ra daw kaayo kalugak maong daghan na hinuong mga kabataan ang nahisalaag padulong sa dili maayong dalan.

Naay mga ga-ingon nga responsibilidad sa mga ginikanan ang pagdisiplina ug pagpadako sa ilang mga anak. Tinuod na. Apan maayo lang nang bahina kun ang mga bata wala pay mga buot.

Kay kun ang bata makasabot na gani sa pipila ka mga butang ug makat-on na og mga pagtulon-an gikan sa uban, moabot na usahay sa punto nga ang bata mokwestyon na kun husto pa ba gihapon ang dinad-an sa ila sa ilang mga ginikanan.

Dunay mga ginikanan nga kuwang ra kaayo sa pag-atiman ug patudlo sa mga anak, apan duna say mga ginikanan nga sobra ra sab kaayo ka protective mao nga usahay paminaw sa mga anak wala na silay kagawasan.

Ang mga ginikanan gyud pirme maoy basulon kun badlungon ang ilang mga anak. 

Kadaghanan sa mga badlungon, gikan sa mga kabus nga pamilya. Tungod kapobrehon, mas unahon nila ang pagpangitag maluto sa kaldero para makakaon  maong  menus na ang oras  para maatiman ang hustong pagdisiplina sa ilang mga anak.

Naa puy ubang mga anak og adunahan masalaag man gihapon sa hiwi nga dalan tungod kay gilaay sa ilang kinabuhi.

Dinhi sa Pilipinas, gidili sa balaod ang pisikal nga pagpanapat nga paagi sa pagdisiplina  pero sagad ni ginabuhat sa mga pamilyang dunay pinansiyal nga problema.

Kaning balaod nga nagprotihir sa mga bata para ni sa kaayohan nila ug sa ilang mga ginikanan, pobre man o adunahan. Kay ang batang protektado ug layo sa abuso, maayo og kaugmaon.

Responsibilidad sa mga ginikanan, bisan unsa pa ang estado sa ilang kabutang, ang pagpadako nga tarong ilang mga anak, kay sila ra gihapon maoy mag-antos ugma kun mapakyas ila sa maong tahas.