Si Nanay Nene, Si Vencia ug Yhen

Ning atong lindog karon, tugoti ko nga akong himoong materyales fuertes sa pamalandong ang tulo ka mga babaye nga akong nailhan dinhi sa parokya.

Silang Nay Nene Nastor kang kansang adlaw nga natawhan nasaulog na niadtong Disyembre 20, 2019. Aktibo nga pagkababaye sa pangedaron nga otsenta padayon gihapon siya sa iyang role ingon nga inahan sa parokya. Mao nga daghang mga pari ug mga bisita ang kaniya mangita kay lagi maalagaron siya nga sobra.

Sa laing bahin dunay cute nga linalang nga ginganlan og Vencia. Kining maong babaye maayo kaayo modala og pagpamaba. Sa akong tan-aw mobangon gyud ang mga patay kun makadungog sa iyang bahakhak nga sa mga suliran makapapulak. Kun sa mga inpormasyon ug mga buhat sa kaluoy duola lang siya.

Si Yhen, sa laing bahin, maoy tipikal sa usa ka dalagang Pilipina. Kay kada human sa Misa de Gallo kuyog sa iyang mga bata siya gyud magpahulagway agig handumanan sa mabulukong adlaw sa iyang kinabuhi. Sa laktod malipayon siya sa hilabihan.

Akong gipaambit kining tutulo ka mga linalang tungod kay anaa kanila ang sanglitanan nga ang matag kinabuhi nga hinulman angayan lamang nga atong pasalamatan.

Matud ni Nay Nene, ang sekreto sa hataas nga kinabuhi mao man ang paghimo og maayo alang sa uban. Sa iyang pagkamagtutudlo sulod sa hataas nga panahon, daghang mga kabataan nga makapamatuod sa iyang kabuotan. Ang iyang pagpangalagad sa simbahan dako kaayo og gikatampo kun nganong hangtud karon padayon gihapon siyang abtik ug malipayon.

 Si Vencia, sa laing bahin, padayong motakod og kalipay sa uban pinaagi sa iyang mga pasiaw nga hilabihan. Kinahanglanon gihapon kini aron sa ingon mamahimong madala dala ra ang kabug-at sa mga problema sa kinabuhi.

Samtang si Yhen angayang ikauban sa pagsugat sa Bag-ong Tuig kini tungod kay anaa kaniya ang malaumong hunahuna ug pagbati nga makita gihapon niya ang iyang matuod nga ikauban sa tibuok niyang kinabuhi.

Kun atong sumadahon kining tanan ato kining malangkob sa ngalan nga JOYCE nga nagpasabot og: Joy ingon nga sukaranan sa kinabuhing maabtikon nga bisan pa man sa kagamay sa atong madawat angay lamang gihapon nato kining saulogon. Ang O kun Optimism mahitabo lamang kun anaa ang Obedience kun pagkamasinugtanon sa kabubut-on sa Dios. Ang You nagpasabot nga ikaw bisan pa man sa imong ka busy ug kahago alang sa pamilya ang kinahanglang mopahuway ug mosaulog sa gihapon. Ang C kun Charity kun gugma o kamanggihatagon ang magdasig kanato sa pagpaambit sa atong panalangin ngadto sa uban. Mas maayo pa ang mohatag kaysa hatagan. Ang E kun Empowerment maoy maghaw-as sa matag tawo gikan sa ilang kaulipnan sa kangitngit.

Niabot na ang Mesiyas mao nga sugaton ta siya diha sa dakong kalipay! Himaya sa Dios didto sa Langit ug kadait sa mga tawo dinhi sa Yuta!