Pagsubli sa kapakyas
Kun ganahan kang mosubay nganong napakyas ang kampanya ni Presidente Rodrigo Duterte batok sa ilegal nga drugas, nga ang Dangerous Drugs Board (DDB) niangkon nga mas nidaghan ang mga biktima sa ilegal nga drugas gikan sa 1.2 milyones pag-asumir ni Duterte niadtong 2016 ngadto na sa 8 milyones sa 2019, palihug sublia unsa kayano ang panglantaw sa presidente dayon niyang banos sa Malakanyang.
Nisaad siya, ug mao ni gitumbok nga usa sa nakapadaog niya sa piniliayng presidensiyal, sa pagsumpo sa krimen, ilegal nga drugas ug pangurakot sud lang sa tulo ngadto sa unom ka buwan.
* * *
Labihan niya kamasaligon sa kalamposan nga giawhag niyang mga botante nga kon mapakyas angay siyang patyon o palagputon sa katungdanan. Dihang giawhag pagpasabot unsaon pagtuman ang saad, si Duterte napugos pagbutyag og pipila ka detalye:
• Iyang ideklarar ang drugas nga hulga sa nasudnong seguridad;
• Gamiton niya ang militar ug kapolisan paggukod sa mga kriminal;
• Magtukod siya og duha ka divisions sa Army ug manguha og dugang 3,000 ka polis.
* * *
Iyang running mate, karon House Speaker Alan Peter Cayetano, mas tabian ug busa nihatag og mas daghang detalye unsaon paghaw-as ang nasud gikan sa krimen, ilegal nga drugas ug pangurakot sud sa tulo ngadto sa unom ka buwan:
• Sa unang adlaw ni Duterte sa Malakanyang, ipatawag ang tanang mayor ug mga heneral sa kapolisan ug militar;
• Tagsa-tagsa nila mandoan pagsumiter og Order of Battle, mga plano sa buy-bust ug case buildup ug lista sa tanang drug pushers sa ilang mga teritoryo; ug
• Banhawon ang special court alang sa bangis nga mga krimen.
* * *
Human sa kapin sa tulo ka tuig, nikumpisal si Presidente Duterte nga napakyas siya ug busa gitahasan si Bise Presidente Leni Robredo sa pagbanos isip anti-drug czar hangtod sa kataposan sa iyang termino sa 2022.
Kay maayo na man tang mosubli sa unsay nahitabo na, mabantang unsay kuwang sa iyang kampanya:
• Way makiangayon nga pagtuon sa problema sa ilegal nga drugas;
• Wa subaya ang gamot nga mga hinungdan sa pagsulbong sa drugas nga nanukad sa lapad nga kakabos ug pangurakot sa kagamhanan; ug
• Diin gikan and ug kinsa ang labing dagkong tigpayuhot sa kinadak-ang bulto sa ilegal nga drugas
* * *
- Latest
