Sa sayong kabuntagon

Bugtong tuktogaok sa manok lang ang akong nadungog sa dihang usa ka kaadlawon niana nimata ko. Akong nakita sa akong kwarto ang naglaundok nga mga karton ug nagpasad nga mga butang timaan ng a hapit na moabot ang gitawag nilang kausaban. Pila na lang ka adlaw mahanaw na ang akong presensiya ning dapit nga akong nahimutangan karon. Sa dili madugay laing anib na pud sa kinabuhi ang angayan nakong subayon.

Sa laing bahin ang maong kasinatian nagpadayag sa dakong  kahigayonan usab nga mosinati og laing matang sa kahimtang ug makighimamat og bag-ong hut-ong sa mga tawo. Nagpasabot kini nga mas nadugangan ang banay sa kinabuhing parianon tungod kay daghang mga tawo ang nahimong kabahin usab sa atong kasaysayan nga matagik matag balhin nato og bag-ong parokya.

Ning paagiha nahimong mas tulokibon ang panaw. May sakit nga kasinatian ug makapakaon kanato og tagam apan may nindot usab nga kasinatian nga naghatag kanato og inspirasyon. Kasinatian nga kun buot hunahunaon dako og kahimoan aron mopadayon pa kita sa atong pagpakabuhi taliwala sa daghang mga panglutos.

Sa akong gihimong pagbalik lantaw sa nangagi akong nakita ang kamot sa Dios nga naglihok bisan pa man sa mga higayon nga ako nahimong madudahon. Sa mga higayon nga wa nako tugoti ng molihok ang Diosnong gahum sa akong kinabuhi. Apan bisan pa niini padayon akong gihatagan og kahigayonan sa Dios aron mabuhi ug mosinati sa mga nindot nga mga hitabo.

Sa paghinayhinay nako og putos sa mga butang dad-onon sa sunod nakong padulngan apil na niini ang mga nindot nga kasinatian nga magsilbing sumbanan sa mga laing damgo nga tagikon alang sa kinabag-an.

Dili man tuod hingpit ang akong paningkamot apan sayud ko nga gihatagan ko og kahigayonan sa Ginoo nga bisan pa man sa akong kahuyangan padayon ko niyang gipangga ug kining maong pagpangga maoy akong sukaranan sa pagpangga usab sa uban.

Ang sayong kabuntagon dili kakapoy ug kalaay kondili bag-ong hunat sa laing hugna sa pakigbisog. Bahala na kun nagkalisud kay diha sa Dios kitang tanan makasugakod.