EDITORYAL - Modernisasyon sa transportasyon

Kinahanglan na gyud ang modernisasyon sa transport system sa Sugbo. Ug kun kanus-a, karon na. Mao kini ang angay nga naa sa hunahuna sa tanang mga local chief executives kun gusto gyud nilang molambo ang ilang mga ginsakopan.

Ang Sugbu nabiyaan na og maayo sa natad sa transportasyon itandi sa Manila. Ang Sugbo ikaduha tinuod sa labing progresibong dapit dinhi sa nasud sunod sa Manila apan pwerteng layoa deperensya.

Ang Manila adunay MRTs, train system, ug daghang mga bus. Padayon pa ang pagdugang og railway systems nila didto samtang dinhi sa Sugbo wala. Usa sa rason mao ang mga local chiefs nga nagduhaduha sa kausaban.

Karon gipaila-ila dinhi ang modernong mga e-Jeeps, Bus Rapid Transit ug ang umaabot nga light rail ug mono rail transit systems.

Dugay na kaayo kining Public Utility Vehicle  Modernization Program apan karon palang gyud nakairog ug unang tikang tungod kay sa nanglabay nga mga katuigan, kondili kontrabida, mahadlok ang mga local chief executives mosunod sa modernisasyon.

Mahadlok nga basin dili na sila botaran sa sunod eleksyon sa mga tawong maapektahan. Ang resulta, daghan ug naghuot pa gihapon ang mga kagang-kagang nga mga karaang pasaheroan diha sa kadalanan.

Usa sab kining kabalaka nga makulban og kaldero ang mga drayber nga mao say gisaligang panginabuhian ang pagpamasahero. Ang maayo niini, tanang maapektahan maoy kuhaon aron maoy momaneho sa mga modernong pasaheroan nga gipatuman sa gobiyerno.

Aron dili magpatara og maneho kay gustong maoy makauna sa mga pasahero ug maoy sagad hinungdan sa disgrasya, sweldohan sila sa ilang pagmaneho isip regular na nilang trabaho.

Total ang tumong ra man gyud sa gobiyerno mao ra man ang modernisasyon sa transport system niini ug dili man ang pagpatay sa mga drayber ug operators.

Ang kausaban magsugod gikan sa kinaubsan apan magagad sa sab sa gihangad nga lider sa katilingban. Magunsa man ang naa sa ubos kun ang ilang lider molikoy?