EDITORYAL - Estriktong access sa social media para sa minors

Giaprubahan na sa Senado ang usa ka balaudnon nga magdili na sa mga kabataang nag-edad og 15 anyos paubos nga maka-access sa gikonsiderar nga age-restricted social media platforms dinhi sa nasud.

Ang  Senate Bill No. 2424 nakadawat og 16 ka botos gikan sa mga senador atol sa sesyon sa plenaryo kagahapon, adlaw nga Huwebes. Ang maong balaud nagmando sa mga social media platforms nga moimplimentar sila og age-verification system.

Kinahanglan nilang suspensuhon, did-an, i-disable or tangtangon ang mga accounts kun maberipika nilang ang gagamit ubos pa sa 16 anyos ang edad.

Pero gitugotan sa maong balaudnon ang mga 16 anyos ug 17 anyos nga makagamit sa restricted platform kung ma-meet ang age –assurance ug chid-safety friendly requirements.

Ang mga bata nga nag-edad 16 paubos hatagan og limitadong pagtugot nga maka-access sa mga platforms nga sertipikado sa DepEd, CHED, o TESDA para sa ilang pagtuon.

Makamulta ang mga social media companies ug ang mga third-party age –assurance providers og P1 million hangtud P20 million per violation.

Apil sab makamulta ang mga ginikanan ug guardians kun tuyoon nila paglikay ang age restrictions para makagamit sa restricted social media platforms ang ilang mga anak. Ang multa magsugod og P5,000 hangtud P50,000  ug o ba kaha mopaubos sila og digital parenting and online safety programs.

Kun hingpit ning mapasar nga balaudnon, taas-taas pa ang latasunon sa publiko para motuhop ug matiman-an kining tanan.

Kay sa pagkatinuod, daghan sa mga ginikanan ang wala masayud kun unsa nga mga websites, social media platforms ang gikabuangan sa ilang mga anak tungod sa gitawag nga “old school mentality” sa uban.

Mas suhito pa ang mga bata sa paggamit anang gadgets nungka sa ilang mga ginikanan.

Hinuon, kun sa ubang mga nasud nahimo nila kini para sa proteksyon sa ilang kabataan, nganong dili man mabuhat dinhi sa ato kun naa na gyuy balaod?

Gikinahanglan lang gyud ang klarong kampanya sa impormasyon bahin aning balaura aron dili makuratan ang uban ilabi na kadtong mga ginikanan nga wala masuhito anang mga cellphones ug social media platforms.