Kultura sa pagtago
Nidaog na ba ang pakigbisog pagpanalipod sa kultura ug kasaysayan sa Sugbo pinaagi sa pagpabilin sa makasaysayanon nga tigbayon sa Patria de Cebu?
Wa pa. Makaginhawa na ba og luag ang mga Sugbuanon nga di na mahilabtan ang kapin sa unom ka dekada nga kabilin sa talagsaon nga panaghiusa sa mga batan-on sa pagtukod og mapuslanon nga abotanan? Di pa.
Di pa hingpit ang kadaogan sa mga Sugbuanon nga nahigugma sa ilang kagahapon.
Di pa sila angay nga mangiyugpos. Kay ang nahauna nga pagsuway pagbukubuko nila mahimo pa nga masubli.
* * *
Unsa pa man diay ang atong gipaabot? Di pa ba diay igo ang pasalig sa Artsidiyosisis sa Sugbo, Cebu Landmasters Inc. ug National Historical Commission of the Philippines (NHCP) nga ipabilin ang 80% sa orihinal nga building sa Patria de Cebu?
Di pa. Kay way bisan usa nila nga naghisgot sa plano, nga labihan kamabudhion kay wa konsultaha ang nagkalain-lain nga hut-ong sa Sugbo, sa pagguba sa building nga gitunglo sa developer ug pipila ka pari nga laksot, samok sa mata, gabok na ug nakahulga pa gyod sa mga nagpuyo.
* * *
Igo lang nila nga gipahibawo nga gitugotan na sa NHCP ang pagpalambo sa luna nga nahimutangan sa Patria de Cebu human sa pagkonsulta sa mga hingtungdan.
Sayon kaayo nila nga gilaktawan sa pag-angkon nga nakumbinser sila sa pag-usab sa orihinal nilang plano tungod sa lehitimo nga protesta.
Wa gani nila ilha ang tampo sa nagpakabana nga mga Sugbuanon nga may mas makiangayon nga mga paagi sa pagbalanse sa kasaysayan, kalamboan ug relihiyuso nga katuyoan.
* * *
Hangtod karon, pila na ka adlaw human gipahibawo sa publiko ang ilang pag-uyon pagpreserbar sa Patria de Cebu, ang mga Sugbuanon nga nitanyag sa ilang panahon, nakamaohan ug pagpanginlabot wa pa hatagi sa inusab nga plano.
Maong may sukaranan ang padayon nilang pagbantay tinud-on ba sa developer o kutob lang sa sulti. Angay nga apilon sa pagsusi ang mga kabalaka nga mahimong hilabtan sab sa developer ang mas dakong luna nga nahimutangan sa Cebu Metropolitan Cathedral.
Hinaot nga kining kasinatian nakatudlo sa kadagkoan sa artsidyosesis nga hunungon na ang naandan nilang pagtagu-tago. Nga maoy nakaingon sa daghan uyamot nga mga eskandalo.
* * *
- Latest
