Bulak sa Valentine’s Day

Wala pay Pebrero, nagpareserba nag bulak sa tanaman sa Sirao ang higala kong Internal Security para iregalo niya sa Valentine’s Day ngadto sa dalagang kauban sa trabaho nga hagbay ra niyang gihalaran. Duha ka beses na kuno niyang gihatagag pungpong sa mga matahom bulak ang maong tsinita.

Una, niadtong pag-birthday niini. Ikaduha, sa miaging Pasko.  Ug puwerte kunong lipaya sa dalaga nga mihangop-gakos sa bouquet of flowers nga mailhang mahalon ang pagkalalik. Samtang nagtan-aw sa hinalaran nga mapahiyumong mihawok sa mga gihay, wala usab  niya mapugngi ang hinagtob sa kakulba ug kahinam nga gipitik sa iyang kasingkasing niadtong tungora.

Busa, gipangutana ko siya: “Unya, ‘on’ na mo?”

“Dili pa, Boss Jav. Pero ang paghatag og flowers ngadto niya, igo na kaayong makahatag og ideya nganong gibuhat ko kadto? Dili na mistil isulti, Boss Jav?” Pahayag sa amigo kong Internal Security.

Mao diay, nga bisa’g may edad na siya, wala gihapon makasulay og uyab. Kay flowers ra man ang pasultion.

Matud pang Eric, laing higala, ultimong suki niyang palitanan og bulak panahon sa mga okasyon, hasta kapila pilopiloa ang presyo niini. Kun sa ordinariyong adlaw, ang bili sa gipamaligyang pungpong sa mga bulak, tag P350 ra, inig ka Valentine’s Day, ang pinakamenus nga presyo, P800. May P1,000, P1,500. Unya, moabot pag P1,800.

Gani, unang adlaw pa lang sa Pebrero, mi-order na siya daan sa iyang suki og kinanindotang bulak para ihatag sa pinangga niyang asawa ning umaabot Valentine’s Day. Pagka very thoughtful husband!

Pipila sa mga babayeng minyo, akong gisukitsukit kun unsay ilang bation kun regalohan sila’g pungpong sa mga bulak sa ilang bana panahon sa Valentine’s Day?

Ilang tubag usa ra: “Sus, Boss Javy, unsaon man nang bulak, uy, nga malaya ra man na. Mahal pa gyud! Maayo pag ipalit na lag lamiang pagkaon unya saw-an namong tibuok pamilya. Happy pa mi tanan!

Mao kini ang iya-iyang reaksiyon ug panahom sa suod kong mga higala dihang gipangutana ko sila unsa ka mahinungdanon alang kanila ang mga bulak sa Valentine’s Day?  Ang balor ba sa katahom sa bulak nga malaya ra, o ang balor sa relasyon sa managhigugmaay (single or married) nga mo-last forever?