Mga senyales nga nameligro ang atong atay (1)

Tingali wala pa kita malimot sa usa sa atong lindog, nga naghisgot mahitungod sa tawo, nga kitang tanan mabata o maedaran man, sa atong panahon, nabuwad gyud kita sa daghang peligro nga hinungdan sa mga balatian.

Gitumong nato kadto sa paghisgot aron mahigmata kita ug magpakabana aron makabaton og ideya aron kamenusan sa epekto sa pagkasakit. Sagad gud nato nahimo na lang ikaduhang prayoridad ang kahimsog sa panglawas ug maoy naglabing prayoridad ang makaugtas nga panlimbasog sa kinabuhi.

Usahay mataligam-an pa ang depensa sa paglig-on sa lawas nga kanunay kulang sa nutrens, kompiyansya kaayo kay maagwanta pa man sa lawas, nga naghulat anus-a mapupos ang kusog sa paglahutay.  Unta mahimo ning inspirasyon nga kakuhaan nato og mga ideya.

Unang epektibong buhaton, mao ang pagbag-o sa atong estilo sa kinabuhi. Abtik ug alisto sa pagmatikod o pagdetek sa mga sintomas ug senyales kun dunay gipamati nga di maayo sa lawas. Magtuon kita sa kaugalingong lawas, aron dayon kita makahimog lakang sa angay buhaton.

Sama sa atong tema nga tukion karon ang mga senyales nga nagkahulogan nga nameligro atong kidney nga dili na epektibo sa iyang trabaho sa lawas. Importante kining kidney, nahimutang ni sa tuo nga dapit ilawom sa gusok, kay mao man ni responsable sa paglimpyo ug pagsala sa 10-150 quarts sa atong dugo kada adlaw.

Kun atong atay madaut maapektahan ang tanang organ sa lawas.  Dagha’g trabaho ang atay busa kinahanglang  kanunay kining himsog.