Hiusahong lig-on, lawas ug hunahuna (1)

Ilista nato ang batakan nga panginahanglan sa kinabuhi — Sama sa tubig, pinuy-anan, bisti, pagkaon ug hangin. Duna pa bay nalimtan ? Oo ang ‘Ki’, usa kini ka butang nga labi pang importante sa batakang panginahanglan sa kinabuhi, nga kanunay lang nato kini natalagam-an kon unsa usab ang kabililhon niini.

Sama sa tawong nikalos og tubig sa dagat, moingon nga ‘kini ang akong tubig’, natural lang kay gikuptan man kini sa iyang kamot. Apan kasamtangan lang niya kini maangkon, kay mobalik man kini sa lawod. Iya kini buhian sa iyang kamot, nga isablig sa balas, o kaha ipatuhop sa yuta o ipa-alisngaw nga tuhopon sa panganod, unya ihulog sa ulan, aron moipon pagbalik sa gigikanan nga lawod.

Ang mao nga senaryo, susama ra usab kini sa atong kinabuhi. Nga gipalibutan sa mga tipik sa mga ‘Ki’ sa uniberso (cosmos) ang atong lawas ug moingon nga ‘ Ako kini ang ‘Ki’ nga naghatag kinabuhi sa uniberso’, sama sa katinuod sa tubig nga giangkon sa nikalos didto sa baybayon, ang ‘Ki’ nga gipanag-iya sa kinaiyahan o uniberso.

Mahimo sab himuong sanglitanan nato ang usa ka baterya sa sakyanan, nga kanunay gikargahan samtang nagdagan. Busa, ang ‘Ki’ nga gigamit nato, abunohan kini nga kargahan og ‘Ki’ nga gikan sa uniberso. Lawom tugkaron ang pagpasabot sa kinaiyahan sa atong relasyon sa ‘Ki’ sa personal ug sa uniberso.

Mao kini ang tinubdan sa kusog sa lawas ug sa hunahuna. Dili mahimong mabugto ang koneksyon sa kusog nato sa uniberso, nga maoy magneto nga kita karon nakabarog nga lig-on ug kabahin na sa kinaiyahan. Gihatagan kitag kagawasan nga palig-onon ang lawas ug hunahuna, aron mas mapuslanon nga gamiton ang katuyoan sa atong pagpakabuhi niining kalibutana.