EDITORYAL - Police Visibility

Adunay dakong kausaban nga makita nato karon sa kadalanan sa Dakbayan sa Sugbo tungod sa presensya sa daghang polis. Ang kausaban gipatuman sa bag-ong director sa Cebu City Police Office (CCPO) nga si Senior Superintendent Royina Garma, nga gustong daghan ang kapolisan sa kadalanan kaysa anha sila mag-estambay sa opisina.

Tanang polis gikan sa ranggo nga Police Officer-1 hangtud PO3, gidestino isip mga beat patrols aron pangusgan ang police visibility, ilabi na sa mga dapit nga sagad anha mahitabo ang krimen, ug ang uban kanila maoy gigamit sa mga anti-illegal drug operations tungod sa ilang edad.

Sa panan-aw sa uban, maayo kining paagiha kay mas luwas ang katawhan gikan sa mga krimen. Wala na’y mga kriminal nga maglaruy-laroy, ilabi na kadtong mga notado na. Apan may pipila ka tawo, bisan na gani ang mga tarong, nga wala kaayo makagusto niini kay gitan-aw nila nga mora na hinoon og gipakita nga dili luwas ang dakbayan tungod sa kadaghan sa mga polis nga nagpaso-paso.

Wa’y sayop sa duha ka habig. Pareho nga maayo ang tumong, apan kining tanan mag-agad lang gyud gihapon sa performance sa mga polis diha sa kadalanan. Kon sila magpatrolya, unya moabusar sa ilang gahum ug magpaturagas lang ug makayatak na sa tawhanong katungod sa mga inosente, kana bati na kaayo para sa komunidad, kay imbes nga ganahan ang mga tawo nga makakita kanila, mahimo na hinoon nga sila kahadlokan, imbes nga respetohan.

Apan kon magpatrolya sila unya matinahuron ug mopatigbabaw kanunay ang maayong pamatasan ngadto sa mga tawo nga ilang masugatan, sigurado nga moani gyud sila og pagdayeg ug respeto. Samtang maayo ang gawi sa kapolisan diha sa kadalanan, angay silang suportahan ug tabangan nga mahapsay ang komunidad. Unta ipadayon kini ug dili lang “ningas kugon” nga maayo lang sa sinugdanan, sama sa unang mga programa sa CCPO ubos sa mga nangaging direktor.