Ang makahimsog nga kinaiya (2)

* Menosan ang pagkahinam-is, aron dili mosaka ang lebel sa bloodsugar. Dinhi kita sagad maigo sa mga komplikasyon.

 * Kalma nga dili kanunay mataranta sa pagdinalidali sa mga gimbuhaton. Makapa-stress kini nga magluya ang lawas ug utok.

* Dili moabuso sa drugas, ingon niana lang ka simple nga dili kita maadik, nga mosangpot sa kadaot sa atong katibuk-an nga pagkatawo.

* Hasta sa panigarilyo, angay mohunong, kay sama ra nagtigum ka og liboan ka toksins hangtud nga manghuyhoy na ang imong mga baga.

* Ampingan ang kaangayan nga limpyo ang pamiste ug lig-on nga pamostura, nga makadani og respito nga masaligan.

* Gamit permi og depensa sa panit sama sa sunscreen, pagkawo o magkupo nga dili mabantang sa grabe nga temperatura.

* Moinom og tubig labing menos 8-12 ka baso kada adlaw nga nagdepende sa pisikal mo nga kalihokan, aron dili maughan ang lawas.

* Dili magsalig sa mga pildoras, kon dili makatarong o mahinanok sa pagtulog, kay makasapot o makasakit kini sa ulo.

* Maghulog og mga sensilyo kanunay sa imong panudlanan o alkansiya nga magamit sa dili damhon nga panginahanglan sa higayon.

* Mobarug nga hugtanon sa paningkamot aron magmalampuson sa kinabuhi, nga dili matay-og sa mga hulga sa pagsulay.

* Seryuso sa pag-asikaso nga matambalan ang gipamati sa lawas, nga dili magpaabot nga mograbe. Kanunay nga maminaw sa kondisyon sa panglawas.

* Magmatngon sa mga pagkaon, iseguro nga kini dasok sa mga sustansiya.