Sangguniang SC

Pahinumdoman nato ang mga sakop unya sa bag-ong Kongreso sa atong tinguha nga marepresentahan unta diha sa mga local legislative bodies ang senior citizens. Sa ato pa, dunay senior citizens nga morepresentar sa mga city, provincial, municipal, ug barangay councils.

Kun adunay Sangguniang Kabataan, nganong wala may Sangguniang Katandaan? Atong hinumdoman nga si Rep. Arthur Yap sa Bohol mipasaka og balaudnon nga giulohan og Sangguniang Senior Citizens Act. Nag-amendar kini sa Local Government Code ug mag-create sa Sangguniang Senior Citizens (SSC), sama sa Sangguniang Kabataan (SK).

Matud ni Yap, ang kasaysayan  naghulagway nga ang barangay system government sa atong nasud, gimugna, ug nagsugod sa Council of Elders nga maoy nagtudlo ug naggiya sa mga batan-on pagpadagan sa  kalihokan sa katilingban ug nga karon nahimo na nga mga lungsod, dakbayan ug mga lalawigan.

Dugang ni Yap: “This historical perspective is not unique to the Philippines. The Roman government, upon which most modern republican governments were molded, started with the creation of Roman Sanate (ato ning makita sa mga salida sa sine – ams) coined from the term ‘SENATUS,’ meaning Council of Elders.”

So, ang kanhi gamhanan nga Roman Empire, gipadagan sa Council of Elders, nga karon maoy gibasehan ug gihimong modelo sa nagkalainlaing republican governments sa nagkalainlaing nasud sa kalibutan.

Gisugyot ni Yap nga atong ibalik ang maong kadungganan ug recognition sa kaalam ug kasinatian sa mga senior citizens pinaagi sa ilang pagmiyembro sa mga local government legislative councils.

Sa iyang bahin, ato usab nga hinumdoman nga si Senador Loren Lagarda, usa sa mga main authors sa RA 9994, mipasaka og susamang balaudnon sa Senado, ang Senate Bill 1418, nga ang mga senior citizens kahatagan og representasyon sa Sangunian sa mga LGUs.

Nagkanayon si Legarda: “Our senior citizens deserve to enjoy a full and happy life. It is not enough that we make laws and policies for the elderly. What we must do is to allow them to actively participate in nation-building, particularly in policy-making and local legislation so that, they themselves can push for the institutionalization of programs that would address their special needs and concerns.”

Nindot kaayo. Kaayohan kini alang kanatong mga senior citizens. Kun ang mga bata (SK) makalingkod sa mga legislative bodies sa local nga pangagamhanan, nganong dili man ang mga puno sa kasinatian nga mga senior citizens? Unta kahatagan kini og pagtagad sa bag-ong pamunoan, ug sa “presumably reformed” nga mga sakop sa Kongreso.