Nag-AWOL sa trabaho

Dear Atty. Divine,

Usa ako ka factory worker ug 10 ka buwan na nga nagtrabaho sa kompaniya nga akong gitrabahoan. Apan niadtong miaging buwan, gibutang ko nila sa probationary status su’d sa unom ka buwan. Sa dihang nasakit ang akong nanay ug nadala sa hospital, mi-absent ko apan wa ko maka-file og leave, apan akong gi-text ang akong kauban nga pahibaw-on ang among supervisor. Duha ka semana ko nga wa makatunga sa trabaho.

Pagbalik nako, gihatagan ko og memo ngano nga nag- AWOL kuno ko. Wa diay sultii sa akong kauban ang among supervisor nga nasakit ang akong mama kay nakalimot kuno siya. Akong gitubag ang memo ug akong gi-attach ang medical certificate sa akong mama. Ang akong pangutana attorney kun mahimo ba ko nila nga taktakon bisan kun wala pa matapos   ang akong unom ka buwan nga probationary period? Unsa may akong buhaton kun ila ko nga taktakon? —Daisy

Dear Daisy,

Ang usa ka empleyado bisan kun anaa kini sa probationary status, mahimo kini nga taktakon sa kompaniya bisan wa pa mapupos ang unom ka buwan nga probationary period kun ikaw adunay nahimong kalapasan sa balaod ug sa kompaniya. Sa imo nga kaso, nahulog nga nag-AWOL ka su’d sa duha ka semana kay mi-absent ka nga wa mananghid kay wa man ka mo-file of leave of absence nga maoy dapat buhaton sa usa ka empleyado. Hinuon wa pa kita masayod kun taktakon ba gyud ka sa imong kompaniya apan mas maayo nga imong hangyuon ang inyong manager or HR department nga hatagan ka og second chance tungod kay ang imong pag-absent naggumikan man sa pagkasakit sa imong inahan. Apan kun ugaling taktakon gyud ka ug alang kanimo dili makiangayon ang maong desisyon, then mahimo ka nga modangop sa NLRC aron sa pagpasaka og reklamo batok sa imong kompaniya.  — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.