Nag-agad nga wa magtagad

Usahay dili gayud kalikayan, nga mabasul ang mga ginikanan sa kapaitan nga nahiaguman sa mga anak. Apan unsaon man sab nga nag-agad ra sila kun unsa’y naandan nga gikamat-an nila sa kinabuhi, mao sa’y imatuto ngadto sa mga anak. Nga wa na magtagad, sa pagpreparar sa pangandoy nga kaugmaran.

Hinuon, magdepende usab kini sa mga pangagpas sa maayong diskarte nga mapalambo ang kinabuhi. Sagad gud wala na manumbaling nga makabaton og mas labaw nga masarangan. Wala na magtagad sa dagha’ng oportunidad, igo na lang gipa-undayunan nga gitaptapan ang nagpaabot nga kahigayonan sa palibot.

Mahadlok na makiglambigit sa mga kalihokan sa katilingban. Aron unta may madiskubre’ng matikad nga kahimoan, aron lig-onon ang pundasyon nga maoy kasandigan sa umaabot. Mao na la’y giseguro ang karon nga namahala sa iyang kaugmaon. Diin kadaghanan sa ingon ini’ng sitwasyon, mao pa’y pagkahiamgo kun moabot ang panahon nga motagamtam na sa hilabihan nga kalisdanan.

Ang kinabuhi, kausa ra moagi kanato ug ang kahigayonan makadaghan modapit kanato, apan kini aduna’y utlanan, ilabi na kun wa magtagad sa kabililhon ini, mahulog lang sa wala’y kapuslanan sa kinabuhi nga mapasagaron. Hangtud mobalibad na ang lawas sa iyang katakos, nga kawad-an na’g paglaum.

Tulukibon ang kinabuhi, kay wa ta masayud kun giunsa kita pagpahiluna alang sa misyon nga gihatag kanato sa kahitas-an. Busa ampingan ug tun-an ang kahigayonan, nga samtang may kusog ug kahayag pa’ng makita, ipukos gyud ang tibuok panahon, kun unsay mas mahimo mo, tun-i ug magplano bisa’g imposible, himuon sa kasayon. Kay kun dili molampos ayaw katagam, ipadayon kun unsay kulang, pun-i sa lahutay hangtud mahingpit ang imong kalampusan.

Pakitabang sa Dios, kay siya’y nasayud sa atong mga panginahanglan.

Adlaw sa  mga Santos

Ni Vilma Andales

Karong adlawa, Nobiyembre 1, giestablisar sa simbahang Katoliko ang kasaulogan sa Adlaw sa mga Santos. Kini mao ang adlaw nga gibalaan sa simbahan ang tanang santos, nailhan man o wala.

Pormal nga gisugdan sa simbahang Katoliko ang kasaulogan sa Adlaw sa mga Santos ug ang Adlaw sa mga Kalag sa panahon ni Pope Boniface IV. Opisyal nga naestablisar sa simbahang Katoliko ang Nobiyembre 1 nga Adlaw sa mga Santos pinaagi ni Pope Gregory III kaniadtong tunga-tunga sa ikawalo nga siglo kon mid-eight century.

Human sa kasaulogan sa Adlaw sa mga Santos, inigkaugma mao na usab ang adlaw sa mga Kalag. Ang Adlaw sa mga Kalag mao usab ang paghandom ug paghalad og mga pag-ampo niadtong posible nga anaa pa sa purgatoryo, gilimpyohan alang sa ilang pagsaka sa langit.

Ang mga Katoliko mosaulog sa Adlaw sa mga Santos ug Adlaw sa mga Kalag sa pagtuo nga adunay espirituhanong pagbinayloay sa pag-ampo tali sa mga santos nga tua na sa langit ug sa mga kalag nga naa pa sa purgatoryo ug sa mga tawo nga buhi pa.

Kini ang gitawag nga "church triumphant" sa mga kalag nga nahilangit na, kon ang mga santos, "church penitent" kon ang mga kalag nga anaa pa sa purgatoryo, ug ang "church militant" kita nga mga buhi pa.

Busa, sa atong pagsaulog sa Adlaw sa mga Santos ug Adlaw sa mga Kalag, atong gipangaliya ngadto sa mga santos ang kaluwasan sa mga kalag nga anaa pa sa purgatoryo. Kita usab nga mga buhi pa magpa-ampo ug magpakitabang sa mga santos.

Base sa atong tradisyon ug kultura, nagtuo kita nga sa adlaw sa mga santos ug mga kalag, sila moduaw kanato ug mopabatyag sa ilang presensiya pinaagi sa mga katingalahang panghitabo.

Dinhi sa Pilipinas, ang mga pamaagi sa atong pagsaulog sa Adlaw sa mga Santos ug Adlaw sa mga Kalag mao ang pagbisita sa mga lubong sa atong mga mahal sa kinabuhi, paghalad og mga pagkaon, mga buwak ug pagdagkot og mga kandila ug labaw sa tanan ang pag-ampo.

Usa usab kini ka nasudnong holiday, busa walay trabaho aron kita mahatagan sa kahigayonan nga makaduaw sa lubnganan sa atong mga minahal nga nitaliwan na.

Sanglit gigahin man karong adlawa pagbalaan ug paghandom sa tanang mga santos ug sa mga kalag nga naa pa sa purgatoryo, unta kitang mga buhi kanunay mahinumdom nga sa atong pagbisita sa mga sam-ang dili ang paghimo og kalingawan, pag-inom, pagsugal ug ang pagsigi og  Facebook, surfing sa net ug uban pa ang atong unahon.

Hinuon, ang atong himuon mao ang pagbalaan sa Adlaw sa mga Santos ug ang pag-ampo alang sa mga kalag nga naa pa sa purgatoryo.