Labing tigulang babaye sa kalibutan

Siya mao si Jeralean Talley, taga Detroit, USA. Giila si Talley nga labing tigulang nga buhi sa tibuok kalibutan human mamatay si Gertrude Weaver, taga Arkansas, sa edad nga 116.

Ang Gerontology Research Group sa Los Angeles maoy nagsubay ug naglista sa mga buhi nga labing tigulang sa tibuok kalibutan.

Atong namatikdan nga kasagaran sa mga centenarian, mga babaye. Nagpasabot nga menus og bisyo ang mga babaye kay sa mga lalaki.

Si Talley abtik gihapon. Mag-schedule pa siya og fishing trip matag tuig. Natawo kaniadtong Mayo 23, 1899. Sa iyang pagsaulog sa ika-114 nga sumad sa iyang pagkatawo, nadani ang pagtagad ni  Presidente Barack Obama, ug namahayag: “She’s a part of an extraordinary generation.”

Ang ilang grupo sa simbahan, adunay fishing trip matag tuig, ug karong tuiga, ila gihapong paubanon si Talley. Nagpasalamat siya sa Labaw’ng Makagagahum nga naghatag kaniya og hataas nga kinabuhi.

* * *

Sa usa sa mga general audiences sa St. Peter’s Basilica sa Vatican City, si Pope Francis mipahimangno “to take care of the elderly.”

Sa iyang pagduaw sa atong nasud, iyang gi-acknowledged ang atong pag-amuma ug pagpangga sa atong katigulangan, lahi sa ubang kanasuran nga matud niya, ila ra nga pasagdan ang mga tigulang.

Niya pa: “When I was in the Philippines, the Filipino people greeted me, saying, ‘Lolo Kiko.’ The first important thing to stress: It is true that society tends to throw us away, but the Lord definitely does not! The Lord never throws us away.”

Dili buot ang Ginoo nga pasagdan ang mga tigulang. Ang mga pag-ampo sa mga tigulang, matud ni Pope Francis, “are a great gift for the families and for the Church.”

Matud pa, mahinungdanon kaayo ang mga ipamulong sa mga lolo ug lola, “because they can serve as a helpful guide for younger people.”

Sa iyang pag-ordinar sa pagka-pari, misulat kaniya ang iyang lolo, naghatag og mga tambag ug mga sumbanan sa iyang pagka-pari. Iya kadtong gi-treasure ug gimahal, gihiposan ug hangtud karon, anaa pa kaniya ang sulat sa iyang lolo.

Ang maong sulat, matud niya: “It does me good.” Naghatag kaniya og daghang kaayohan.

Atong likayan ang giingon nga “throw away culture,” nga sama ra nga atong isalikway ang tigulang. Maayo man gani kay dinhi sa atong nasud, gimahal nato pag-ayo ang atong katigulangan.

Niini, nagpasalamat kita sa matahom nga kultura sa atong nasud nga wala sa ubang kanasuran.