Tagna-tagna lang, wala’y klaro!

Sa nasinati nato nga paglandong sa panahon sa nakalabay nga mga adlaw gumikan sa mura’g gabon o aso sa kawanangan, seguro halos tanan nangita’g husto ug scientific nga pagpasabot kun unsa ang hinungdan niini. Gani nakamugna kini og kahingawa sa uban sa posible nga dautang epekto nga mamugna, ilabi na sa panglawas sa katawhan.

Apan ang mga hingtungdan nga ahensya sa kagamhanan nga mao unta ang makahatag og katin-awan, wala man magkatakdo ang ilang theory.

Ang Department of Environment and Natural Resources (DENR) misalindot sa posibilidad nga ang aso gikan sa sunog sa kalasangan sa nasud sa Indonesia.

Gipaneguro sa DENR nga luwas pa ang hangin nga hanggapon sa mga tawo base sa resulta sa air quality test nga ilang gihimo.

Samtang ang PAGASA mipasabot nga dako ang kahigayonan nga ang “haze” nga nasinati karon sa Sugbo mugna sa halapad nga sunog sa kalasangan sa Indonesia ug nadala dinhi tungod sa hangin nga habagat nga gisamotan pa sa pagkaumol sa low pressure area nga maoy nakapakusog sa pagkapalid sa aso padulong sa Pilipinas, ilabi na sa Visayas ug Mindanao. Diha nga gikuhaan og reaksyon ang Department of Health (DOH) kun unsa ang angayan nga buhaton sa mga tawo ug angayan na ba nga magsul-ob og mask, ang kadagkoan sa DOH igo lang mitubag nga huwaton lang nila ang report gikan sa DENR kun unsa g’yud ang hinungdan sa “haze.”

Kun ingon niini ang ilang pagtagad sa isyu, na maabtan sila og siyam-siyam sanglit mismo ang DENR wala man makatumbok kun unsa’y tinuod nga hinungdan sa haze.

Mas maayo unta nga maghiusa kining mga ahensya sa pagsusi sa hinungdan sa nasinati nga phenomenon aron matumbok ang resulta ug ang mga epekto sa katawhan kay sa magtagna-tagna lang sa ilang tubag kun adunay mangutana.