EDITORYAL - Patas nga proteksyon

Nameligro nga mapunta sa wala ang mamahimo untang legasiya sa pamunoan ni Presidente Benigno Aquino III, ang Bangsamoro Basic Law.

Apan ang BBL susama og gihimo pabor lamang sa mga kaigsuonang mga Muslim sa Mindanao ug dili para sa tanan base lang sa reaksyon ug pagsupak sa mismong mga taga Mindanao.

Ang tonada sa interpretasyon sa mga kritiko sa BBL nagpakita nga wala hatagi og importansya sa mga Kristiyano ug Lumad sa Mindanao.

Dunay mga probisyon nga gikwestyon ang mga magbabalaod kay sa ilang tan-aw dakong supak sa kasamtangang Konstitusyon ug naghatag og sobrang gahom ngadto sa Bangsamoro.

Ang BBL naghatag og sobra-sobrang gahom ug pundo alang sa gibanabanang 10 milyones nga Pilipinong Muslim samtang ang nahibiling 90 milyones nga mga Kristiyano ug mga Lumad, wala.

Tungod ba kay duna silay mga armas? Unya balewalaon na lang ang patas nga proteksyon, pagtagad nga gigarantiya sa Konstitusyon alang sa tanang mga Filipino?

Ang nahitabo sa Mamasapano, Maguindanao usa ka ‘blessing in disguise’ aron mapukaw ang atensyon bisan kadtong mga magbabalaod  nga sikit kaayo sa administrasyong Aquino.

Mas maayo nga subayon ug debatihan pagbalik ang BBL aron walay moreklamo bisan unsa pay hulga nga himuon sa Moro Islamic Liberation Front, kun sensiro pa sila, wa na kinahanglana pa ang BBL.

Way padulngan ang pakigbisog sa MILF pinaagi sa armas kontra sa gobiyerno. Apan labaw nga way padulngan ang ilang giinsister nga bersyon sa BBL kun ang unod niini moyatak sa katungod sa kadaghanang Pilipno.