Marwan ug SAF44
Unsa may nahitabo sa hinugpong nga mga operasyon sa militar ug kapolisan batok nilang Abu Marwan ug Basit Usman sa niaging 10 ka tuig nga posibleng maoy nakapakumbinser sa liderato sa Special Action Force (SAF) sa Philippine National Police (PNP) sa pagdumili na pakigsawo sa labing uwahi nilang kasayuran ngadto sa Armed Forces of the Philippines (AFP)? Giangkon ni AFP Chief Gregorio Pio Catapang nga nakahimo na sila og daghang operasyon batok nilang Marwan ug Usman sukad pa niadtong 2005. Nagkasabot ug nagtinabangay ang mga polis ug mga sundawo sa nangaging mga operasyon. Apan napakyas sila pagkuha sa duha ka gipasanginlang tighimo og bomba alang sa mga terorista.
* * *
Sa labing uwahing operasyon, nagdumili nang SAF pakigsawo sa ilang kasayuran ngadto sa AFP. Bisan gisugo siyang Presidente Noynoy Aquino pakiglambigit sa AFP ug ubang mga ahensiya, determinado si kanhi SAF Chief Getulio Napeñas Jr. pagtago sa kasayuran gikan sa AFP ug labi na gikan sa Moro Islamic Liberation Front (MILF). Tak-om si Napeñas bisan gipatawag siya ni Major General Edmundo Pangilinan og tigom sa Zamboanga City sa niaging buwan ug gipakisayran sa mga detalye sa nag-ung-ong nilang operasyon. Si Pangilinan igo ra sang nagtuman sa sugo ni Catapang. Kinsa igo ra sang nagtuman sa sugo ni Presidente Aquino niadtong Nobiyembre ug Disyembre pagtabang sa operasyon sa SAF.
* * *
Makapanalipod si Napeñas sa iyang hukom pagtago sa kasayuran. Matumbok niya ang paglampos sa SAF pagtultol ug pagpatay ni Marwan nga maoy labing lig-ong ebidensiya sa talagsaong panginahanglan pagpreserbar sa sekreto nilang operasyon. Ang iyang kapakyas pagpahibawo sa MILF mahimong maoy nakamugna sa sayop nga pagtuo sa mga rebelde nga sila maoy gi-atake sa SAF ug busa nakiggubat dayon pagpanalipod sa ilang kaugalingon. Ang iyang pagdumili pagpakiglambigit sa AFP mahimong maoy hinungdan nga wa dayon katabang ang kasundalohan sa naapiking SAF commandos. Apan niinsistir si Napeñas nga husto ang tanan niyang gihimo kay ilang nakuha si Marwan.
* * *
Nangangkon si Catapang nga kun nakiglambigit pa si Napeñas nila, may sugyot unta sila pagkuha ni Marwan nga di kinahanglang makalas ang 44 ka SAF commandos: Paggamit sa mga helikopter nga may night vision gear (NVG) pagkuha sa mga sakop sa SAF human nila napatay si Marwan. Apan gawas sa sulti way ikapakita si Catapang, napakyas ang tanang nangagi nilang operasyon. Ang plano paghipos ni Marwan naumol sa wa pa si Presidente Aquino sa Malakanyang ug sa di pa si Napeñas ang pangu sa SAF. Nahimangod si Aquino sa wa pakiglambigit ni Napeñas sa AFP. Apan natuman ni Napeñas ang tahas. Maong niinsistir ang iyang mga sakop nga di kapildehan ang kamatayon sa 44 ka SAF commandos kay mas daghang makalas kun wa pa nila mahipos si Marwan.
* * *
- Latest
