Ikaduhang massacre sa Maguindanao

Dili lalim ang gibati karon sa mga pamilyang gibilin sa dul-an 50 ka mga sakop sa Special Action Force sa Philippine National Police nga gi-ihaw didto sa kampo sa Moro Islamic Liberation Front samtang gi-serve ang warrant of arrest sa international terrorist nga si “Marwan.”

Angay hikutahon sa gobiyerno ang pagpahimutang sa katapusang pahulayanan sa mga patay’ng lawas ug tabang sa pamilyang gibilin sa mga bag-ong bayani ug biktima sa ikaduhang dugoong massacre sa Maguindanao. Sa mga polis nga napatay nga adunay mga anak nga gipamilin, angayang hikutahon sa Department of Interior and Local Government ang ilang mga scholarships.

Subo man palandungon nga mikalas og kinabuhi sa mga police commandos, apan ang pagbuhis sa ilang kinabuhi maoy bugti sa kalampusan sa nasud pagpuhag kang Marwan, tinuod nga ngalan mao si Zulkipli bin Hir nga usa ka Malaysian, nga maoy suspetsado sa pagpamomba sa Bali, Indonesia nga mikalas og gatusan ka kinabuhi sa mga turista.

Si Marwan giilang eksperto sa paghimo og bomba ug nagtago kini sa balay sa usa ka Imam sulod sa kampo sa MILF ug gituhoang nanudlo og “bomb-making” sa mga sakop sa Abu Sayyaf ug Bangsamoro Islamic Freedom Fighters. Gituhoang may kalambigitan si Marwan sa mga pagpamomba sa Mindanao. Ug nagtuo ko nga may kalambigitan kini sa pagsulay og patay kang Pope Francis, apan napakgang sa kapolisan ug DILG pinanguluhan ni Sec. Mar Roxas.

Kining gihulma nga “board of inquiry” ni Sec. Roxas makatabang kini sa pagsusi sa pamaagi paghimo sa operasyon pagdakop kang Marwan. Dungan niini, girelibohan sa puwesto si SAF Director Getulio Napenas.

Si Roxas tua karon sa lugar aron sa pagpangunay sa pag-imbestigar sa hitabo aron mahatagan og hustisya ang mga polis nga gipamatay. Sumala sa text message nga atong nadawat, daghan sa mga polis ang gipamutlan og ulo ug kinatawo nga gipansak pa sa ilang mga baba.

Wala masayang ang kinabuhi sa mga polis nunot sa ilang kamatayon nga nasugatan taliwala sa pagpatuman sa balaod. Unta, ang DILG nga maoy nagsuperbisar sa PNP dili magmakulang sa paggukod kinsay responsable sa ilang kamatayon.

Dili ko motuo nga simpleng “misencounter” ang nahitabo. Kun nahitabo nga tulo o 10 lang ka casualty, motuo ko nga misencounter.

Gi-ulan og mga pagsaway ang MILF ning maong hitabo. Sa ilang mga kamot namatay ang mga polis. Dugay ra gihangyo ang MILF sa pag-surrender sa mga armas sa ilang mga sundalo, nunot sa ipasar na unta nga Bangsamoro Basic Law. Apan sige silang balibad.

Motuo pa ba kamo nga seryoso ang MILF sa kalinaw sa Mindanao?