EDITORYAL - Unaha ang kabos, dili ang pagpangawkaw

Bug-at ug pintok kaayo ang mensahe  ni Pope Francis kagahapon sa mga lider ug sa mga politiko dinhi sa Pilipinas, pagtinarong, magmatinud-anon ug dili mangurakot uban sa pagtabang sa mga kabus.

Kini maoy way panabi nga mensahe ni Pope Francis atol sa iyang State Visit kang Presidente Benigno Aquino III nga gitambongan sa kadaghanan sa mga miyembro sa kabinete niini ug mga pamilya uban sa mga kaalyado ug kaatbang sa politika.

Gitambagan usab sa Santo Papa ang mga lider nga repormahon ang estraktura sa katilingban nga mao karoy hinungdan sa nagkadaghang mga kabus ug nagbale-wala kanila. Apan kinahanglan nga mag-usab ang mga lider sa ilang panghunahuna ug pagbati sa katawhan.

Gihagit niya ang tanan, lider o mga yanong tawo sa katilingban nga likayan ang paghimo og kurapsyon kay mao kini ang hinungdan nga mahikawan kanunay sa ilang angayang matagamtaman ang mga kabus.

Bug-at usab ang pamahayag sa Santo Papa nga kinahanglang buhaton sa gobiyerno ang tanan aron mobati ang mga kababayen-an, kalalakin-an ug kabataan nga sila kabahin sa katilingban.

Subling gipalanog ni Pope Francis ang kaniadto pa panawagan ug pangaliya sa katawhan Filipino nga kinahanglang magbaton og kinaiyang magmatinud-anon, dili mangurakot, may integridad ug naglantaw sa kaayohan sa kinabag-an.

Kini nga mga awhag sa Santo Papa maayo unta kun motuhop sa mga kasingkasing sa tanang lider sa Pilipinas ug dili sila mabutahan sa gahom ug silaw sa salapi nga dili ilaha.

Husto ang Santo Papa sa pag-ingon nga kung magtinabangay ug magrespetohay ang mga lider sa Pilipinas mas magamit niini sa husto ang abundang abot sa kinaiyahan.