EDITORYAL – Pangandam sa katalagman

Baynte ka mga bagyo wa pay labot ang mga tropical depressions ang masinati sa Pilipinas matag tuig. Panahon na karong 2015 nga mo-invest ang gobiyerno sa pagpangandam alang sa dinaliang pagresponde.

Angayan nga mangandam na usab sa umaabot nga pagsulod sa ting-ulan sugod sa bulan sa Hunyo  apan kinahanglang maapil unta sa pagpangandam ang pag-usab sa “bulokrasya” sa nasud.

Pwerte g’yung dugaya ma-release ang pundo nga gikinahanglan sa mga biktima. Mag-abot na lang ang mga katalagman apan wala pa gihapon mahatag ang pundo sa unang bagyo.

Gituyo ba kaha kini aron mausa ang gastos o taas lang g’yud kaayo ang proseso? Dili man ni ikalimod sa gobiyerno tungod kay nakita man diha sa Yolanda victims ang ebidensya.

Apan ang nag-antos niini mao ang mga biktima, mga nawad-an og minahal sa kinabuhi, kapuy-an ug pagkaon para sa ilang pamilya. Sa habig sa militar, gawas sa pagpangandam sa external  threat nga mao karon ang pokus, mas maayong iapil sa ilang mission objectives ang pagpalit og mga ekipo nga magamit sa pagresponde sa mga katalagman.

Dunay nanggawas nga mga impormasyon sa mga defense forums sa internet kabahin sa pagpalit sa Pilipinas og duha ka Strategic Sealift Vessel (SSVs) nga may pagka-parehas ang function sa usa ka multi-purpose vessel. Magamit kini isip temporary evacuation vessel , adunay landing seacraft, helicopters, heavy equipment, ambulansya ug uban pa.

Maayo kini nga investment alang sa Philippine Navy isip usa ka nasud nga gilangkuban og daghang mga isla nga kinahanglan ang dinaliang ayuda kun dunay katalagman. Mas maayo usab kun madugangan pa ang kapabilidad sa Philippine Air Force paghakot og relief goods sama sa dugang medium-lift o heavy lift cargo planes

Dunay daghang leksyon nga nakat-onan sa nangaging mga katalagman, apan unta suportahan kini og lihok sa mga naa sa pwesto.