Kakain ng binlid?

Talagang ang ating gobyerno sa ngayon

kaladkad ang bansa tungo sa korapsyon;

gumawa ng budget na maraming trilyon

upang ang kakampi’y wagi sa eleksiyon?

Ang budget na ito’y tiyak mapupunta

sa bulsa ng mga kaalyado nila;

mga nasa LP ang magpapasasa

sa mga proyektong bayan ang kawawa?

Mga kongresista at mga senador

may pork barrel uli sa kanilang sektor

kaya ang kawawa ay tayong electors

tiyak tatambakan nang malaking suhol?

Nag-iisa lamang saka babae pa

sa malaking budget ay tumutol siya;

Senator Santiago naghayag ng pita

ang malaking budget ay sobra talaga!

Nakita ng Senadora masamang diskarte

sa inaprubahang budget na kay laki;

bawal na ‘pork barrel’ malaki ang parte

tiyak mapupunta sa mga buwitre!

Kaya naiisip nitong sambayanan

ang PDAF at DAP lilitaw na naman

kaya lang posibleng sa ibang pangalan -

at ang ‘cash sa mahirap’ ibubulsa na lang?

Maraming buwitreng kasama si P-Noy

na ayaw alisin sa mga posisyon;

sila’y nagpayaman nariyan pa ngayon

kaya imposibleng LP’y makabangon!

Pero kung ang tao ay talagang manhid -

walang pagbabagong tayo’y makakamit;

pumapayag silang tayo’y manlimahid

mga anak natin kakain ng binlid!