Presscon dili makasulbad sa baha

Sama sa naandan, human sa baha sa miagi’ng Huwebes, nag-presscon dayon ta, as if mao kini ang solusyon sa baha. Sundan dayon sa mga press releases. Human niini, maghuwat na lang pud ta sa sunod nga baha. Unya, presscon na pud.

Human niadtong bagyo’ng Ruping nag-unsa man ta? Of course, nag-presscon dayon. Unya, unsa may nahitabo tapos sa presscon? Unsa man kadtong tuiga? Sige na man lang ta’g presscon.

Anyway, sa among panahon, wa g’yud sukad magbaha ang dalan Colon. Kun buot huna-hunaon, diha man say mga kusog nga bagyo ug pagbunok sa ulan.

Wa man mi maproblema sa baha. Sa Opon, pananglitan, [and perhaps, sa mga dakbayan sa Mandaue ug Talisay], wa g’yud ko kahinumdom nga magbaha bisa’g unsa ka kusog ang bagyo ug ulan.

Akong nahinumdoman, dihay Bob, dihay Amy, mga kusog kaayo nga bagyo. Apan, way baha sama sa atong mga baha karon. Ngano man ni?

Tan-aw nako, kining tanan nanghitabo man usab kini sa ubang suok sa kalibutan. Panimalos kini sa atong pagpanamastamas sa kinaiyahan. Ang nature naningil na sa atong utang kanila.

Busa, tungod kay ang kinaiyahan mao na may atong kontra, wa na ta’y mahimo niini. Bisa’g pun-on pa nato ang tibuok siyudad sa mga drainage. Ug labaw pa’ng walay mahimo, bisa’g mag-presscon pa kita kada adlaw.

Murag uwahi na ang tanan. Grabe na kaayo ang atong pagguba sa kinaiyahan. Sa novena sa Mahal nga Birhen sa Kanunay’ng Panabang, nagpasalamat kita sa Ginoo, sa iyang paghimo ug paghatag kanato sa kalibutan aron atong ampingan ug alimahon. Apan, giunsa man nato ang kinaiyahan?

Gipamutol nato ang mga kahoy, gisemento ang mga uma kay tukoran og mga subdivision; gisampongan ang mga sapa ug waterways; atong gipuno sa basura ang mga estero, mga dagko’ng building gitukod ibabaw niini, bisa’g supak sa balaud, nahinumdom ko, variance ang justification niini sa City Hall.

Mao nga gumikan sa hilabihan nga kadaut nga atong gipahamtang ngadto sa matahom ug mabungahon unta nga kinaiyahan, mao usab ka mangtas ang panimalos karon sa kinaiyahan batok sa tawo.

Suliran kini sa tibuok kalibutan. Mga matang sa katalagman nga wala masinati sa tawo sa unang mga panahon. Maayo man gani kay misaad man ang Ginoo nga ang deluge dili na mahitabo pag-usab hinungdan nga lunop ug landslide na lay atong mahiaguman karon. Arang-arang na lang.

Apan, ngano kadto nga nahitabo ang deluge?  Ato kuno ning hinuktokan.