Marites ug budol

Nagduda si Tomas Osmeña nga nalambigit si Mike Dino sa operasyon sa Philippine Offshore Gaming Operators dinhi sa dakbayan sa Sugbo. Ang iyang pagduda iyang gibuhian atubangan sa mga sakop sa Quad Committee nga nagpahigayon og pakisayod sa Extra-judicial killings ug operasyon  sa POGO dinhi sa Sugbo.

Gihimong basihanan ni Tomas Osmeña ang iyang pagduda ni Dino ang iyang giingon nga dakong kalamboan sa dakbayan sa Sugbo nga nagkantidad og bilyones ka pesos.

Apan dihang nahinabi sa usa ka stasyonan sa radyo dinhi sa Sugbo ug gipaklaro kaniya ang  iyang gipanulti atubangan sa mga sakop sa Quad Committee mahitungod sa tag-as nga building nga iyang giingon nga iya kang Mike Dino,  daw sama na sa piso nga nayab-an og kinilis si Tomas Osmeña-nausab na ang pamahayag.

Iya nang giingon atol sa iya interview sa radyo nga nagtuo siya nga ang taas nga building nga gitukod anaa kilid sa Montebello Compound nga gipanag-iya ni Mike Dino apan wala diay,  ug gipanag-iya kuno kini ni Jo Soberano sa Land Masters. Ako giingon dili ko 100 porsiyento nga segurado.

Dinhi giangkon ni Tomas Osmeña nga ang iyang gipanulti atubangan sa mga sakop sa Quad Committee bunga lamang sa iyang pagtuo nga walay basihanan buot ipasabot minarites lamang. Kun nakadungog niini si Kongresista Robert Ace Barbers, ang Tsirman sa Quad Committee, dayonon pa kaha niini sa pagpabalik si Tomas Osmeña unya sa Oktobre 20 puhon?

Pero kun ako lang, ako dayonon ang pagpabalik ni Tomas Osmeña sa pagtambong sa imbistigasyon sa Quad Committee pero ang ako ipangotana ngadto kaniys mao na ang iyang paglingla sa mga sakop niini ug sa pagpatuo kanila sa iyang gipanulti nga walay mga basihanan.

Kun nabiktima sa Marites nga kasayoran ang Quad Committee, nabudol pod ang katawhan nga Pilipinhon sa 5,500 ka mga flood control project nga giingon ni Presidente Bongbong Marcos nga nahuman na lukop nasud pero dili nato makita dinhi sa Sugbo ug sa ubang bahin sa nasud. Unya ra ba kun imong pangutan-on ang Presidente asa ning dapit ang Flood control nga proyekto dili na motubay ug dili na motubag. Timailhan ba kini nga hasta ang Presidente nailad sa iyang mga tawo? Nabudol si Presidente Bongbong Marcos?