Margot pailisan?

May mitug-an kanako nga ang kampo sa Team Rama nagplano g’yud nga tangtangon si Konsehal Margarita “Margot” Osmeña pagka tsirman sa Committee on Budget and Finance sa Cebu City Council.

Nahisgotan gani kini’ng mao nga isyu diha nga adunay mga kapitan sa barangay dinhi sa dakbayan sa Sugbo nga alyado sa Bando Osmeña Pundok-Kauswagan (BOPK) gipatawag og tigum didto sa opisina ni Vice Mayor Edgardo Labella sa miagi’ng semana.

Si Buhisan Barangay Kapitan Gremar Barete maoy mitug-an niini kanako nga apil nga nahisgotan sa ilang panagtagbo mao nga mahulipan g’yud unta si Margot sa pagka pangulo sa budget and finance committee kay giisip nila kini nga babag sa mga tinguha ni Mayor Michael Rama.

Pastilan no kining politika? Apan yuna pa, dili ba makaayo sa usa ka administrasyon nga adunay check and balance? Kon masuta nga maayo ang proyekto sa mayor dili man ‘sab tingali babagan ni Konsehal Margot.

Kon ang pagka tsirman sa committee on budget and finance ihatag ngadto sa laing konsehal nga alyado sa Team Rama, dili kaha tulin pa sa “manatad” nga aprobahan ang dukomento bisan og wala kaayo kini masubay sa lagda?

Paminaw nako, musamot kadaghan ang mga “adverse findings” sa Commission on Audit sa administrasyon ni Mayor Rama. Ang akong nabantayan mao nga ang tanang sugyot nga gastohan, ilabi na og adto kuhaon sa Pagcor funds, sutaon man g’yud kon nasubay ba kini sa lagda.

Dunay mga sugyot sa pagpamalit og sakyanan nga adto kuhaon sa Pagcor Funds ang kuwarta ug mora’g gikuwestyon kadto kay wala masubay sa lagda nga gilatid sa Pagcor nga maoy nagdonar sa kuwarta.

Unya sayop ba diay na? Uyonan lang g’yud diay ni Konsehal Margot bisan og wala masubay sa lagda ug wala makompleto ang mga papeles? Matud ni Kapitan Barete nga giingnan sila nga ang tanang barangay gahinan og tag P20 Milyones gikan sa budget karong sunod tuig.

Wala hinuon makatingog ang konsehal nga kaniadto sakop sa BOPK ug karon misugod na pakig-alyado sa Team Rama diha nga giingnan sila sa kapitan nga dili usa sila maghisgot sa P20 milyones kay hangtod karon wala pa man gani ma-release kanila ang tag P6.6 milyones nga gahin sa matag barangay gikan sa City Development Fund.

* * *

Buyno, alegre kaayo ang kalamboan diha karon sa City Council ug angay  nato kini nga panid-an kanunay. Kini hinuon nga mga konsehal nga nagpatuo nga mga Independente, nagtuo g’yud ko nga dili sila “pure” nga wala’y gidapigan.