Telcos kawatan og load

Nagkaproblema na pag-ayo ang National Telecommunications Commision (NTC) paghatag og pagtagad sa mga text scam nga mibiktima sa daghang subscribers sa mga telecommunications company.

Sigun sa rekord sa NTC, miabot na og 1,129 ang mga nabiktima sa text scam dinhi sa nasud nga mireport kanila kaniadtong miagi’ng tuig samtang karong tuiga miabot na usab og 967 ang nangreklamo.

Ang NTC miangkon sa ilang kapakyas pagsulbad sa suliran tungod sa kakuwang og kahimanan nga makasubay ug mailhan nila kinsa ang mga tawo nga nangilad ug sa wala pagrehistro sa mga simpack.

Apan kun nagkaproblema sa text scam ang NTC, dili lang kini mao ang ilang suliran. Mas maayo pud seguro nga tan-awon sa NTC ang mga kawat sa load sa cellphone nga nakaseguro ko nga dili lang ako ang nabiktima.

Kaniadto’ng Martes, ka upat ko nagpa-load ug ka upat pud ko kawati sa akong load. Ang pinaka sakit kay bisan ka usa wala gayud ko maka-text o makatawag sa bag-o lang nako nga gipa-load.

Ang kawat sa load mas maayo’ng bantayan usab sa NTC tungod kay dili lang gamay nga kantidad ang nalambigit niini. Ang kawat sa load kun matigom sa mga telecommunications company tingali moabot og minilyon nga makapasamot sa ilang pagkadato ug makapaguol kanato.

Dili na lang ko maghisgot dinhi unsa nga telecommunications company ang kawatan kay wala’y mapili nila’ng tanan.