Ang hustong pagpangga

Ang pagmahal o pagpangga maoy gasa nga gituga sa kahitas-an aron ipabati ngadto ni bisan kinsa nga adunay kinabuhi. Mananap man o tawo, makasulti man o dili, ang pagpangga atong mabatyagan dili lamang sa pulong kun di sa lihok o buhat nga motuhop ngadto sa pagbati ang kahulogan sa mensahe nga pagsagop.Usahay adunay managsukwahe ang pagsabot nila niini.

Hinuon ang pagpabatyag sa pagpangga magdepende usab kini sa kasinatian sa mopangga. Kun unsay iyang pagsabot niini, mahimo nga kini usab ang iyang mapakita ngadto sa iyang gipangga. Gani lang dili niya masabot kun kini ba tinuod nga pagpangga kay giisip man nga subra ra, nga masaypan hinuon nga kasilag o panghimaraut inay kaluoy ug pagsinabtanay sa pagbati.

Kitang ginikanan o kadto nga dunay gipangga, iseguro nga maampingan ug matun-an pag-ayo nga mo-epekto gayud ang itanom natong pagpangga. Ipasabot nga dili lang lunlon o pulos kasuko ug pagbasul ang isilsil sa panghunahuna. Kay mobalitok kini nga saypon nga nagtisok ikaw og pagdumot. Isipon kining kalibog nga dili makatugkad sa tiunay nga pagpangga. Hangtud moabot ang kahiamgo, nga mao na lay atong mapalandong nga di diay tukma kadtong paagi nga maoy gipahimungtan ang nasinating kapakyasan. Nga wa magdahum, iyang napasunod sa pagtoo nga kini mao ang pagpangga. Ug nahimong linugdangan ang kanunay kasamok tungod sa dili pagsinabtanay. Maamong ug maguba hasta ang paglaum maabot ang pangandoy sa kinabuhi.

Busa kun sa atong pagtoo nasayop kita sa paagi sa hustong pagpangga, atong himoon ang kausaban. Maghimo’g eksperimento o stratehiya, ihaum ang angay pinaagi sa pag-amuma nga may kaluoy. Kun may nasayop, disiplinaha sa pagpasabot. Ayaw tungloha o pasipad-i, ipabatyag ang kamatinud-anon nga himuong ehemplo ang kaugalingon sa katarong nga kita angay usab panggaon.

Daghan na karon ang nalimot aning usa sa sekretong elemento, sa pagpalig-on sa pagsinabtanay nga mao ang hustong pagpangga. Niini mohugot ang pagginaksanay sa unsa may kakulian, makaresulbar kini pinaagi sa pagpangga nga adunay positibong paghangop sa pagbinatiay alang sa malipayong kinabuhi.