Ang mga listahan

Niining nagkadakong kontrobersiya sa pork barrel nga gikalambigitan sa mga magbabalaod, sentro gihapon si Janet Napoles. Apan tinuod kaha kining alas nga gihuptan sa giingong reyna sa pork barrel scam?

Ang alas ni Napoles nga akong gipasabot mao nga giingong iyang listahan sa mga magbabalaod nga nalambigit sa maong kontrobersiya. Ug dili lamang usa, duha o tulo ka magbabalaod kondili hilabihan nila ka daghan.

Apan dili lamang diay si Napoles ang nagtiner og listahan sa mga senador ug kongresista nga nalambigit sa maong anomaliya. Wala pud diay nagpalupig ang iyang bata-bata kaniadto nga karon miyagyag sa iyang mga baho.

Ang gitipigang files ni Benhur Luy nagpakita nga hilabihan ka taas nga listahan sa mga magbabalaud nga nalambigit sa maong pork barrel scam. Ug makapanlimbawot kini sa balahibo kanatong ordinaryong magbubuhis.

Gani hasta mga pari wala pasayloa niining maong kontrobersiya. Basi sa maong listahan, daghan kuno sa mga nagsutana ang ulipon sa maong pork barrel ug nga midawat og dakong kantidad.  Ug dili lamang si Luy ang adunay listahan. Si kanhi senador Panfilo Lacson aduna usab kunoy listahan sa mga senador ug kongresista nga migahin sa ilang pork barrel ngadto sa giingong mga pekeng foundation ni Napoles

Kini nga listahan gikan usab kuno sa kampo ni Napoles niadtong kusog pa ang taho nga naningkamot kini nga mamahimong state witness sa Department of Justice batok sa plunder case nga iyang giatubang ug sa tulo ka senador.

Ambot lang kun magtakdo ba kaha ang mga listahan ni Napoles, ni Luy ug ni Lacson. Sa pagkakaron, tua pa sa DOJ ang lista ni Napoles. Ug dakong tanghaga nganong wala gyud kini giyagyag sa departamento hangtud karon.

Apan usa lamang ang unod niining maong mga listahan. Kini mao ang mga ngalan sa mga senador, kongresista ug uban pa nga nalambigit sa pork barrel scam diin bilyones ang nasuyop gikan sa kaban sa kagamhanan.  Kun unsa ka tinuod ang maong listahan, ang kahitas-an lamang ang nasayod. Apan niining maong kontrobersiya, usa lamang ang grabeng naalkanse. Ug kini mao mismo kitang mga lungsoranon.