Padrino sa POGO
Ambot tinuyo ba, o naatlan lang, nga ang imbestigasyon sa Presidential Anti-Organized Crime Commission (PAOCC) sa ilegal nga Philippine Offshore Gaming Operation (POGO) hubs nipuntirya na sa pipila ka opisyal sa administrasyon ni kanhi Presidente Rodrigo Duterte.
Way lalis nga si Duterte ang nipasulbong sa POGOs pinaagi sa paghatag nila og lisensiya sugod 2016. Angay siyang manubag sa higanteng kahasol nga nahatag sa nikabayo nga langyaw nga mga kriminal. Mas dako siya og atraso kon tinuod nga iyang mga sinaligan, o siya mismo, nidupa sa ilegal nga kalihokan sa POGOs.
* * *
Ang PAOCC maoy unang nakatimaho sa koneksiyon sa administrasyong Duterte sa badlungon nga POGOs:
Nakahipos sa mga dokumento sa Lucky South 99 sa Porac, Pampanga nga nagbisto nga si kanhi Presidential Spokesperson Harry Roque ang abogado sa tag-iya sa yuta, nga mao ra say tag-iya sa ilegal nga POGO; ug
Nakadakop sa babayeng Chinese national nga gidudahang manager sa Lucky South 99 nga nisuway paglayas sa Pilipinas agi sa Davao International Airport (gibutyag nga kasagaran sa mga opisyal sa POGO sa nangaging mga higayon didto niabot ug nibiya sa Davao).
* * *
Nisunod ang Philippine Amusement and Gaming Corporation (PAGCOR) pagpabuhagay sa ilang kasayuran:
Nga kanhi sakop sa gabinete ang nag-apura sa bag-ong liderato sa PAGCOR paghatag og lisensiya sa ilegal nga POGO hubs; ug
Gihatagan og lisensiya sa kanhi liderato sa PAGCOR ang POGOs bisan wa kapasar sa mga panginahanglan ug kadudahan ang kalihokan (sa 298 ka POGOs sa administrasyong Duterte, 43 ra ang nakatuman sa mga lagda ug nahatagan og lisensiya sa administrasyong Marcos).
* * *
Gipalili sab ta nila asa ni padung. Nipahibawo ang PAOCC nga nailhan na nila kinsa ang kinadak-an nga padrino sa ilegal nga POGO. Nakatultol na sila sa iyang nahimutangan pero padayon pa nga naghipos og dugang mga ebidensiya nga direktang mosumpay niya sa human trafficking, prostitusyon, kidnap for ransom ug ubang bangis nga mga krimen.
Kon nahibawo sa kabagis sa POGO ug mga kanhi opisyal ang protektor, nganong giduphan mang Presidente Ferdinand Marcos Jr. ang POGOs nga dakong tabang sa buhis ug mga trabaho? Nganong naabtan man og duha ka tuig ang Malakanyang una nakahukom pagpatigbabaw sa interes sa publiko?
* * *
- Latest
