Bana makiha og panglugos sa asawa

Gipalig-on sa Korte Suprema ang hukom sa Regional Trial Court sa Cagayan De Oro City nga nagkonbikto sa bana nga gikiha sa iyang asawa og pagpanglugos.

Ang kaso nga pagpanglugos gipasaka sa asawa batok sa iyang bana kaniadto pa’ng 1999 tungod sa paglugos kaniya sulod sa duha ka higayon kaniadto’ng 1998.

Ang bana gikonbikto sa RTC sa Cagayan de Oro ug ang maong hukom gi-affirmed sa Court of Appeals niadtong 2002. Ang bana nga wala makontento sa hukom midangop sa Korte Suprema ug paglabay sa 15 ka tuig, ang labaw nga hukmanan mipakanaug usab sa iyang hukom nga nagpalig-on sa hukom sa ubos nga hukmanan.

Sa ilang hukom nga gipakanaug kaniadtong miaging semana, ang mga justices sa Korte Suprema miingon nga ang kaminyoon dili lisensiya aron pugson sa bana ang asawa sa pagpakighilawas kaniya. Matud pa sa Korte Suprema nga ang bana wala’y property rights sa lawas sa iyang asawa.

Kini’ng mao nga hukom sa Korte Suprema gibase sa Anti-Rape Law nga nahimo’ng balaod kaniadto’ng 1997 diin naglatid nga si bisan kinsa -- ma-babaye man o ma-lalaki, asawa man o bana – mahimo na nga mapasakaan og kaso’ng pagpanglugos kun mamugos sa pakighilawas.  

Kamo’ng mga bana nga nagbasa niini’ng ako’ng lindog karon, kapila na man ninyo lugosa ang inyong asawa?

Ang hukom sa Korte Suprema wala magpasabot nga ang asawa lang ang makapasaka og kaso’ng pagpanglugos sa iyang bana tungod kay ang mga bana puwede usab nga makapasaka og kaso’ng pagpanglugos sa iyang asawa.

Kana kun pugson usab siya niini sa pagpakighilawas. Ang pangutana lang kun may bana ba pud kaha nga mokiha sa iyang asawa og pagpanglugos tungod sa pagpugos kaniya sa pagpakighilawas.