Postal ID dugay

Abril 21, 2014. Lunes sa alas 3:55 sa  hapon. Miadto mi sa Window 26 sa Postal Office sa Aduwana kay molukat og Postal ID card alang sa akong anak lalaki.

Pag-abot pa lang namo, gisugat dayon mi’g balibad sa hamtong nang babaye, kinsa maoy in-charge sa nahisgotang window. Matud niya hangtod alas 4:00 sa hapon ra kuno siya modawat og mga aplikasyon para postal ID kay ting-remit kuno ning orasa sa kuwartang iyang nakolekta gikan sa namayad anang adlawa. Ang nakaparat kay mibiya dayon siya sa iyang puwesto ug gibiyaan lang kaming nanagbarog kinsa nagkinahanglan sa iyang serbisyo.

Dugay kaayo ming nagpaabot sa iyang pagbalik. Ug sa iyang pagbalik igo lang ming gihatagan og application form. Ug giingna’g usab, nga inig ka ugma kinahanglang mosayo kay alas 4:00 sa hapon ra kuno siya kutob modawat og aplikasyon.

Amo kining gituman. Nianang pagka-ugma, Martes, alas 2:00 sa hapon didto na kami sa Window 26 dala ang tanang rekisitos nga gikinahanglan. Abi namo’g okay na tanan. Naunsa ba nga gisultihan na man sab sa in-charge ang akong anak nga ang vicinity sketch sa among gipuy-an kinahanglang papirmahan sa ilang kartero. Ang problema kay ang kartero nga mopirma, alas 4:00 pa kuno sa hapon moabot.

Pastilan, unsa mang matanga sa serbisyo kining gibuhat sa taga Postal Office ngadto sa ilang mga kliyente: Padugayay? Postal ID lang, molungtad og 5-working days ang pag-issue ngadto sa sibilyan nga nanginahanglan? Tiaw bay, Lunes ming mi-aplay, unya pabalikon ini’g ka Biyernes pa? Paita! Top management ning maong Postal Office, maayo ning subayon, da, unsa ang hinungdan sa kalangay? Aron makorehian dayon, Sir.