Ang bag-ong libelo

Gideklarar sa Korte Suprema nga legal o constitutional ang Cybercrime law nga magsilot niadtong mga tawo nga modaut sa reputasyon sa tawo pinaagi sa paggamit og computer.

Sa nahisgotang balaud puwede nga taralon sa hukmanan ang midaut sa kadungganan sa usa ka tawo diha sa facebook, twitter ug uban pang mga social media outlets.

Sigun sa bag-ong balaud nga gideklarar nga legal o constitutional, ang orihinal lamang nga naghimo sa libelous nga pamahayag ang mapasakaan og kaso ug walay labot kadtong igo lamang sa pag-like o mihatag sa ilang komentaryo sa gipublikar nga pamahayag.

Nunot niini daghan ang naglagot ug misaway sa nahimong hukom sa Korte Suprema gumikan kay matud pa nila wala nay manalipod sa ilang katungod sa pagpadayag ug mahimo na unya kunong sayon para sa mga tawo nga ilang nakomentaryohan ang paglutos kanilang mga nangomentaryo.

Para nako sayop ang ilang pagtuo. Ang Cybercrime law nagkontrolar lamang o nag-regulate lamang sa ilang mga komento nga wala na mahasubay o masulod sa koral sa gitawag og kagawasan sa pagpadayag.

Sigun sa akong nakita ang uban sa mga mahiligon sa social media miabuso na maong angayan ug matarong lamang gayod nga sila pitulon ug pahinumduman sa ilang limitasyon.

Ang nakaapan ugod aning uban nagtuo sila nga walay limitasyon ang ilang katungod sa pagpadayag maong bisan unsa na lamang ang ilang ipang post. Gani apil na sa ilang gisudlan ang pribadong kinabuhi sa gusto nilang komentaryohan.

Ang katungod sa pagpadayag alang lamang kini sa mga pahayag nga may kalambigitan sa interest sa publiko ug dili alang sa pribadong tawo.

Sa mga wala makauyon sa balaud ug sa hukom sa Korte Suprema ayaw mo og kabalaka tungod kay walay molutos ug mokiha kaninyo og kasong libelo kun ugaling nahasubay lamang kamo sa limitasyon sa inyong katungod sa pagpadayag. Ayaw lang mo paglapas.