Ang personal interest

Bisan ang nilitary mipahibalo na nga nakontrolar na nila ang Bangsamoro Independent Freedom Fighter (BIFF) hinungdan nga ila nang gipapauli ang mga nanglalin tungod sa gubat, padayon gihapon ang BIFF sa ilang laraw nga paghimo og kagubot sa Mindanao.

Niadtong Martes usa ka improvised explosive device ang gipabuto dili layo sa nagdulong nga sakyanan sa militar didto sa Maguindanao. Sa maong adlaw giangkon usab sa Moro National Liberation Front ni Nur Misuari nga nakig-uban na sila karon sa BIFF aron ipadayon ang krusada nga magmugna og usa ka Independent Islamic Muslim Mindanao.

Hinanggaw! Mao ni ang akong ikasulti sa ilang laraw. Kun ang Moro National Liberation Front ni Nur Misuari ang mosulti, dili ko mutoo kay dili na kini katoohan. Milabay na ang iyang panahon ug ang maong panahon iyang giabuso.

Ang Moro National Liberation Front gihatagan na og dakong kahigayonan sa atong kagamhanan nga mapalambo ang Mindanao. Tanang suporta ang gihatag sa kagamhanang Fidel Valdez Ramos ni Nur Misuari kinsa naglingkod nga gobernador sa Autonomous Region of Muslim Mindanao (ARMM). Bilyones nga kantidad sa salapi ang gihatag sa gobyerno para sa Mindanao pero unsay nahitabo? Giwaldas lang kini ni Nur Misuari.

Kun ang BIFF ang mosulti, dili upod gihapon ko mutoo tungod kay wala silay kalainan sa Moro National Liberation Front ni Nur Misuari. Ang personal interest ra gihapon sa ilang mga pangulo ang ilang ipatigbabaw ug dili ang interest sa ilang mga membro.

Bisan ang bag-o lang napirmahang kasabotan tali sa gobyerno ni Pangulong Noynoy Aquino ug Moro Islamic Liberation Front dili garantiya sa kasulbaran sa suliran sa kalinaw sa Mindanao kun ang mga magpadagan unya sa Bangsamoro ang ila lang gihapong personal nga interest ang ipatigbabaw.

Kun ang personal interest lang gihapon sa mga giilang pangulo sa Moro Islamic Liberation Front, Moro National Liberation Front ug Bangsamoro Independent Freedom Fighter ang ipatigbabaw, magpabilin gihapong dangog ang kalinaw sa isla sa Mindanao.

Tungod kay ang personal nga interest sa nahisgotang grupo ang gipatigbabaw kanunay nga may misiak ug mibiya.  Sa dihang nakigsabog-sabot og kalinaw ang Moro National Liberation Front sa gobyerno ni pangulong Ramos, mibiya ug naglain ang Moro Islamic Liberation Front nga gipangulohan ni Hashim Salamat.

Sa dihang nakigsabot-sabot og kalinaw ang Moro Islamic Liberation Front ngadto sa gobyerno ni Pangulong Noynoy Aquino, misiak ug mibiya si Ombra Kato ug miporma sa iyang Bangsamoro Independent Freedom Fighter. Silang tanan nga misiak ug mibiya sa ilang mga grupo kaniadto ug nagporma og ilang kaugalingong giila sa atong gobyerno. Mao kini ang hinungdan nga ako nagtoo nga kun ilhon na usab sa gobyerno ang grupo ni Ombra Kato anaa na usay mosiak ug mobiya niya ug wala kini kataposan hangtod nga dili na ipatigbabaw nila ang ilang mga personal interest.