Kanus-a pa kamo molihok?

Hangpon nako ang pagkatudlo sa akong amiga nga si Dr. Lucelle Mercado isip bag-ong Cebu City administrator. Siya ang mipuli sa pwesto nga gihuptan kadiyot ni Engr. Eugene Elizalde.

Gipili ni Mayor Michael Rama si Lucelle nga maoy himoong bag-ong city administrator kay mihukom man si Elizalde nga dili siya mopadayon paghupot sa mao nga katungdanan.

Mao diay nga sa pagtudlo g’yud ni Mayor Rama kang Elizalde nga bag-ong city administrator hulip ni Atty. Jose Marie Poblete tulo ka semana na ang milabay, wala g’yud siya mamirma og mga dukomento nga naglambigit sa iyang opisina.

Nahadlok diay si Elizalde nga basin og maigo sa santako sa balaud kay naglingkod man usab siya isip sakop sa Board of Directors sa Metro Cebu Water District (MCWD).

Dihang akong gipangutana, gipasabot ni Elizalde nga adunay balaud nga nagdili sa “double compensation.” Iya kini nga gisabot nga dili maayo ang pagdawat og sweldo isip city administrator unya modawat ‘sab siya’g honorarium sa MCWD.

Dagku g’yud hinoon ang honorarium nga ihatag sa mga sakop sa MCWD Board ug ang ilang trabaho mora’g magtigum lang sila kaupat sa usa ka semana.

Akong gihuna-huna pag-ayo ang argumento ni Elizalde. Kun ang “double compensation” maoy iyang gikahadlokan, dili diay mahimo nga moserbisyo siya pagka city administrator unya dili lang siya modawat og sweldo?

Apan sagdi na lang, nalipay na lang ‘sab ko nga si Lucelle maoy nahimo nga city administrator kay dali ra siya nga maduol namo nga mga sakop sa media.

Isip city administrator, si Lucelle magsilbi nga “little mayor” kay siya man maoy mopatuman sa tanang kamandoan sa mayor ngadto sa mga pangulo sa lainlaing departamento sa City Hall.

* * *

Akong tawgon ang atensyon sa akong higala nga si Acting City Engineer Jose Marie Poblete nga hatagan unta niya og pag-atiman ang mga wala mataboni nga lungag sa mga kanal.

Daghan kaayo kining mga kanal nga wala na’y mga tabon ug kuyaw kaayo nga adunay mabuwasot kun adunay maglakaw panahon sa lunop.

Diri sa kilid sa among building sa The Freeman, dunay mga kanal nga wala nay tabon. Sa ubang lugar ‘sab dapit diha sa eskena Manalili ug Legaspi duna ‘sab.

Akong balikon, unya na ba kita molihok kun aduna nay mahitabo?

Wala man gud ko malimot nga kaniadto dunay bata nga nagduwa-duwa atol nga kusog kaayo ang uwan didto sa Capitol Site. Nabuwandos bitaw ang bata ug nahulog sa lungag sa drainage system, patay g’yud ang bata.