EDITORYAL - Ang warning ni Mayor Duterte

Kung ang  tanang  mayor  sa nasud  sama  kang  Mayor  Duterte sa Davao City, kinsa mipasidaan  sa  mga  smuggler  nga  iyang  pangihawon, magkingking  na  baya  tingale  ang  mga kawatan.

Mao  bitaw  nga ang  mga tulisan  sa Davao  nanglayas  sa  ubang  lugar sama  sa Cebu, Manila  ug  uban  pang bahin  sa  nasud  sa kahadlok  nila  ni  Mayor  Duterte.

Sa  bahad  niya  nga  pamatyon  ang  mga  rice  smuggler,  gisaway   si Duterte  sa  mga  sakop  sa Commission  on  Human Rights (CHR) kay  kuno mihimo  na  siya  og  lakang  labaw sa balaod.

Apan matud  pa  ni Duterte  nga mao  kini  ang  mahimong  sentimento  sa  usa  ka  lider  nga gustong  molaban  sa  mga  kabus.

Ang nasud gitapuk-an  sa  mga  opisyal  nga  surambaw  ug  kawatan  busa  molambo  man  kini  apan  hinay  kaayo  gumikan  kay  ang  hinipusang  kuwarta  kuwang  ra  sa panginahanglan.

Giingon  nga anaa  na  sa 100  ka milyon  ang populasyon  sa nasud  karon base  sa  record  sa National  Statistics Office (NSO).

Samtang  magtubo  ang gidaghanon  sa tawo  sa Pilipinas  mag-anam  usab  kahibus ang  panudlanan  niini  sa kadaghang  pakan-on.

Unya  kun may mahipusan  mang  salapi  kiriwon  pa  gyud, busa  kun  ang  mga  lider  sa nasud pareho  pa og  hunahuna  ni  Duterte, aw  may  kawatan  man pero dyutay  na  lang.