Laing problema sa CCMC bldg.

Nag-atubang karon og suliran ang administrasyon ni Mayor Mike Rama karon nga nasayran nga dili diay mahimo nga tukoron ang bag-ong Cebu City Medical Center (CCMC) sa South Road Properties (SRP) tungod sa polisiya sa Department of Health (DOH) nga ang mga tambalanan kinahanglan dili ipaduol sa dagat.

Karon nga gikinahanglang dalion ang pagtukod sa bag-ong edipisyo nga mas dakodako kay sa naandan nga CCMC building nga gideklarar nga “unfit” human sa 7.2 nga linog niadtong Oktubre 15, mitumaw kining polisiya sa DOH pun-an pa sa ka-walay pundo alang sa pagtukod niini.

Ang “Piso Mo Hospital Ko” campaign ni Mike nakatigum lamang og P10 milyones, apan ang gastohon sa bag-ong edipisyo (apil na tingale ang mga bag-ong medical equipment niini) moabot og P1.5 bilyones.

Kun barogan ni Mike ang piso-piso campaign aron maka-ospital ang siyudad sa Sugbo, mahuman na lang tingale iyang termino, walay mahitabong konstruksiyon sa bag-ong CCMC building tungod sa kadako sa panginahanglan samtang langay ang proseso pagpangita og pundo alang sa maong katuyoan.

Apan hangtod karon naglibog ko nganong ang piso-piso ang gusto ni Mike nga aduna man untay daghan pundo nga kakuhaan alang niini.

* * *

Angay natong bantayan unsaon paggasto sa Kapitolyo ang P13.33 milyones nga cash assistance nga gihatag sa United Nations Development Programme (UNDP) ngadto sa kagamhanan sa lalawigan alang sa post-Yolanda rehabilitation program.

Nalipay ko nga nagbasa sa balita nga ang Hunta Probinsiyal mihatag og katungod kang Gob. Hilario Davide III pagpirma og kasabutan tali sa UNDP alang sa paggasto sa maong kantidad nga gihatag alang sa mga biktima sa bagyo.

Apan bantayanan kaayo ang pagpahat niini ngadto sa nagkalainlaing katuyoan.

P4.5 milyones niining P13.33 milyones mapunta sa skills training alang sa mga biktima sa bagyo, P7.83 milyones alang sa cash-for-work program sa mga lungsod sa Sta. Fe, Bantayan island ug San Remegio.

Mga P1 milyon ang madawat sa Bogo United Fishermen Association ug P4.5 milyones ipamalit og mga kagamitan alang sa skills training.

Estrikto ang UN pag-monitor sa kuwarta nga ilang gihinabang, busa dili angay masayop ang Kapitolyo aron sa sunod simbako og adunay sama nga katalagman, aduna pay mga international bodies nga motabang kanato.

Hinaot nga walay mga politiko nga mokiriw ang mga kamot pagpanghilabot niining pundo nga gihatag sa UNDP aron gamiton sa kaugalingon nilang katuyoan.