Malungkot na Pasko

Malungkot ang Paskong sa ati’y darating

pagka’t hindi lahat maraming pagkain;

Miyembro ng pamilya’y nawalay sa atin

maraming tahanan ngayo’y giba pa rin!

Sa lindol at bagyo nalumpo ang bansa

ang Visayas region ngayo’y dapang-dapa;

Awiting Pamasko doo’y baka wala

mga mamamayan pawang lumuluha!

Kaya anong saya ang ating gagawin

sa lagay na itong sakmal ng panimdim?

Kahit na umasang sila’y babangon din

parol sa bintana’y di na mapapansin?

May mga lugar pang hindi dinaratnan

ng biyaya’t tulong ng pamahalaan;

Maraming relief goods ang hindi namasdan

kaya luksang-luksa barangay at bayan!

Anuman ang ating isipin sa ngayon

mga nasalanta ay hirap bumangon;

Mga gibang bahay ay wala nang parol

wala ring marinig mga Christmas Carol!

Ang mga awiting doo’y maririnig

daing sa naglahong ama at kapatid;

Kaya ano pa ngang ating masisilip

mga tao roo’y sakmal ng hingpis!!

Tayong naririto sa ligtas na bayan

magdasal ang dapat sila’y matulungan;

Ang magarbong Pasko ay ating iwasan

at hangaring sila’y gumanda ang buhay!