Ang panakit sa tuhod

Wa kini gipili bisan bata o edaran na, daghan na kita’g nakita nga luya ug di na kalahutay sa pagbarug o paglakaw, kay lagi nanakit ang mga tuhod. Kun unsay mga hinungdan niini, daghan kayo ang mahimo natong tukion karon. Apan ang nag-unang hinungdan ini mao kana ang iyang genetic komposisyon sa lawas o pagkatawo, nga napanunod sa kaliwat, maong ing-ana na gyud siya.

Sa maong kahimtang nagkinahanglan kini’g pagtutok sa mga eksperto nga matun-an nga kini dili mograbe o mapugngan pinaagi sa bag-ong teknolohiya. Ang uban, sagad naa sa kakulang sa nutrisyon. Nanubra ang pagkaon, maong nitambok pag-ayo apan masakiton gihapon. Hilabihan na kabug-at nga pas-anon ang kapasidad sa lawas ug unya masakripisyo o madaut ang iyang mga lutahan.

Naa say uban, tungod sa depresyon mapug-ok o maluya ang mga tuhod nga nawad-a’g umoy o kusog maong mosakit ini’g barug malukapa. Ang ingon ani, pwedeng hikapon (touch therapy) o masahean lang aron maulian. Kana pud nga himarat o hinam-is kaayo makaapektar kana sa lutahan. Hasta ang hinginom og mga softdrinks o tonic soda nga dunay mga sambog nga sodium o asin.

Kadtong paraygon nga  halos di molihok, kun patrabahoon manakit dayon ang tuhod. Ang sobra pud nga ehersisyo sa paglakaw, pag-alsa’g bug-at, painat o paugnat sa kusog nga kulang na lang patayon ang lawas, aw samot makadaut sad kana kay mangagisi, mahilis kadtong litids o natural nga proteksyon, nga maoy depensa sa atong mga lutahan  (tendons o ligaments).

Dunay hapin nga morag plastic nga tisyo ang atong mga joints o lutahan, nga kun mapudpud, mahilis o maguba, haskang sakita kun matandog na.Dili ka na papahuwayon sa kangulngol nga bation. Sakit kining ginganlag osteo arthritis. Matud sa mga doctor wa na kini kaayohan apan puwede tambalan nga temporaryo wad-on ang kasakit apan mobalik-balik ra pud inig hupas.

Hinoon sa hustong nutrisyon, may purohan pang ayohon ang nadaut nga lutahan.