EDITORYAL - Hinabang sa kagamhanan gisimang?

Mas maayong klarohon  sa  mga  ahensya  sa kagamhanan  nga  nanghatag  og hinabang  ngadto  sa taga  Bohol.

Kini  human sa sipa  kaayong  mga  taho  nga  mas  gidayeg   ang  pagpanghatag og  mga  hinabang  sa pribadong  sector  kay  nasuperbisahan pag-ayo  ang  ilang  pagpanghatag.

Samtang  ang  sa  goberno,  kasagaran  wa  kuno  kini  ikatunol  ngadto  sa mga  incumbent  nga  kapitan  sa mga  barangay nga  nalusno  pag-ayo  sa linog.

Giingon  nga  didto  kuno  kini  mahipunta  sa  mga  kamot  sa  di kapitan  apan mokandidato  sa barangay  nga suod  ra usab  sa mga  kadagkuan  nga  gipiyalan  sa goberno  sa  pagpanghatag  sa  mga  hinabang.

Misangpot  na  hinuon  nga  wa  ikahatag  nga  pareho  ang maong  mga  hinabang  kundi  didto  ra  sa  mga  suporter  mismo  sa  mga kandidato  nga  gipiyalan  sa  maong  mga  hinabang,

Nganong  ingon  man  niini? Wa  ba diay  mga ahensya  sa goberno  kansang  mga  tawo  maoy mangunay  sa pagpanghatag  nga way  dapigan  sa  mga  nabiktima?

Ang  mga  biktima sa katalagman  wa magpili  og  mga  tawo,  busa  way angay  palabihon  sa tanang  mga  biktima  kundi  parehason  sa pagpahat-pahat ang  mga  ikatabang  kanila.

Kun ingon  niini  ang  dagan  sa mga  gagmay pang  nangatungdanan  sa  goberno  nga  mipahimos  sa kahigayonan, mas kuyaw  kining  mga  tawhana  nga  molampos  sa pagka-dagkong  opisyal  sa nasud  kay sila  ang  mga korapsu.