Asawa, mga katabang gipatrabaho sab ni JVR

Unsa ka tinuod kining taho nga gihatod sa usa ka Talisaynon diri ning tagsulat bahin sa pagpasulod ni Mayor Johnny V. de los Reyes (JVR) og trabaho sa iya mismong asawa ug mga katabang (househelp) diha sa Talisay City Hall (TCH)?

Matud pa sa suki natong tinubdan, nga panahon sa adlaw, haskang mingawa kuno sa balay nilang JVR. Wa gyud kunoy tawo nga nahabilin sa ilang pinuy-anan. Kay atua na man trabaho tanan sa iyang opisina sa TCH. Anha pa gyud kuno sila magluto ug mangaon sa City Hall. (Hinuon, discretion kini ni JVR. Siya ang hari karon sa TCH ug wala’y makapugong kutob sa unsay iyang buhaton. Malas lang, kay miumol og mga negatibong reaksiyon sa katawhan kining mao niyang diskarte.)

Ang balay-siyudad (city hall) sa mga Talisaynon gihimo kunong extension house ni JVR. Ang nakapabor lang kay duruha nay mohatag og suweldo sa iyang mga katabang: ang gobiyerno..ug usab, siya! Kana, kun mohatag pa siya’g suhol sa mga atsay gikan sa iyang personal nga bolsa, ha?

Bisa’g naghinobra na ang  job order sa TCH, mihayir pa gihapon si JVR og mga bodyguards. Ang nakadeperensiya lang, Boss Jav,” dugang asoy sa tigpaniid. “Kay grabe na ka-estrikto ang TCH karon. Deperensiya kaayo sa nangaging administrasyon nilang: Eddiegul ug Soc, diin kaniadto ang mga tawo nga adunay tuyo sa mayor, sulod-gawas lang sa opisina sa labing kasayon. Apan karon..ning pagdumala ni JVR, di na ka bastabastang makasulod. Harangan ka sa mga bodyguards ug pangitaan ka’g schedule sa appointment. No appointment, no entry! (Sa bagay, for security reason, okay lang.) Pero sa dinad-an, molutaw ang dakong kalainan.

Aron pagsukod unsa ka tinuod kining gihikyad sa atong tigpaniid, gisukna ko siya kun wala bay sagol bakak kining gipahungaw niyang mga pagsaway? Ug haskang dalia ra niining nakahatag og pintok nga tubag: “Bisa’g imo pa ron sulayag adto ang TCH karon, Boss Jav!”

Hinuon, tig-adtoan gyud ang atong tinubdan sa TCH halos kada-adlaw. Kay anaa man siya’y kuhaon. Usa siya ka intellectual voter. Mao nga motaas iyang blood pressure kun magpabadlong ang nakadaug nga kandidato, kinsa maoy iyang gibotaran.