Empleyado nga wa maka-report sa trabaho tungod sa sakit, makonsiderar bang resign na?

Daghan sa atong mga empleyado karon nga gipaagi na sa agency o ba kaha gipapirma og mga kontrata sa ilang mga employer busa inig abot nila og lima o unom ka buwan i-renew lang ang ilang kontrata sa ilang employer. Tungod sa pagsige og renew sa ilang kontrata ang ubang kawani miabot na og tag tulo ngadto sa pito ka tuig nga nagtrabaho sa ilang kompaniya. Apan kun ang empleyado di makatunga sa iyang trabaho tungod sa iyang pagkasakit makonsiderar ba kining resign na? Kana nga pangutana ang atong tubagon karon sa atong column.

Dear Atty. Divine,

Usa ako ka trabahante sa factory. Aduna mi kontrata sa among employer nga diin ila kining i-renew matag lima ka buwan. Apan miabot na og tulo ka tuig ang akong pagtrabaho sa maong factory tungod sa ilang pagsige og renew sa akong contract. Niadtong Hulyo nasakit ko og gitambagan ko sa akong doctor nga mopahuway lang una sa pagtrabaho busa mi-file ko og sick leave for 15 days. Apan ang akong doctor mitambag nako nga himoong usa ka buwan ang pagpahuway sa trabaho aron hingpit ako nga makapahuway kay gabii man gud ang akong trabaho. Human sa usa ka buwan mibalik ko sa pag-report sa trabaho. Apan ang among HR Department mitunol kanako og termination letter kay matud pa ila kono ko nga gikonsiderar nga resigned na sa trabaho ug mi-preterminate sa among kontrata. Wa ko mo submit og resignation letter atty, busa ang akong pangutana, mamahimo ba nako silang ikiha og illegal dismissal? Unsay angayan nako nga buhaton? Hinaut nga imong matubag ang akong pangutana. Salamat daan. —Ben

Dear Ben,

Kun atong tan-awon ang imong status makonsiderar ka na nga regular employee tungod sa kanunay nga pag-rehire ug pag-renew sa imong kontrata sud sa tulo ka tuig nga diin kini nagpasabot nga gikinahanglan gyud ang imong serbisyo sa imong kompaniya. Ang usa ka regular nga empleyado dili mamahimong taktakon sa serbisyo kun way lig-ong basihan nga pinasubay sa Labor Code. Dili sab mamahimo nga ila kang ikonsiderar nga resign na or mi-preterminate sa inyong kontrata kun wa ka mosumiter kanila og resignation letter o uban pang dokumento nga nagpamatuod nga mi preterminate ka sa imong contract ngadto kanila.Ang Korte Suprema aduna nay desisyon may labot sa pag-resign sa usa ka empleyado diin matud pa sa Labaw’ng Hukmanan nga ang voluntary resignation dili mamahimong i-presume lang sa employer kondili kinahanglan gyud kining pamatud-an.(D.M. Consunji Corporation v. Bello, G.R. No 159371, 29 July 2013).Sa ato pa, kun mopasaka ka og kasong illegal dismissal adunay posibilidad nga paboran ka niini apan depende sab hinuon kining tanan sa mga ebidensya nga inyo unyang ipresentar sa Labor Arbiter. Busa kun hingpit na gyud kang gitaktak sa imong trabaho mas maayo nga mopasaka ka og kaso aron ang Labor Arbiter na ang bahala nga motimbang-timbang sa inyong mga ebidensya. Hinaut nga akong natubag ang inyong pangutana. — Atty. Divine

 Alang sa inyong pangutana ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.