Panginahanglan ug katungod sa matag ginikanan

Pagpamalandong alang sa Malangkubong Kaayohan

Ang katungod sa mga kabataan lamang ang nahatagan og igong pagtagad sa kadaghanan. Apan kun atong patidluman, mismong ang mga ginikanan ang adunay katungod usab ngadto sa ilang mga kabataan.  Kining maong katungod ang naglangkob ning mosunod:

 1. Katungod sa matag ginikanan nga iyang pakgangon ang iyang anak nga makighugoy-hugoy sa mga kaubanan kang kansang kinabuhi ug pamatasan kwestiyonable.

Natural ra man tingali sa usa ka ginikanan nga manginlabot por lo menos sa mga lakaw ug mga kakuyog sa iyang batan-ong anak. Tingali dili kini hisabtan sa anak sa unang higayon nga anaa ang pagdili ug pagbabag.

Apan sa kaulahian ang batan-on makaamgo sa bili sa maong lakang nga gihimo sa iyang ginikanan. Kini tungod kay tumong lamang sa ginikanan nga dili mahisalaaag ang iyang batan-ong anak sa husto nga dalan. Dangog kaayo ang kalibotan matud pa nila ug prevention is better than cure.

Lisud man sab nga pasagdaan sa usa ka ginikanan ang iyang anak nga makighugoy-hugoy ngadto sa mga batan-on kang kansang impluwensiya ang magdala og kaalautan sa iyang anak. Ang usa ka batan-on dili mamahimong drug addict kondili siya makigkuyog sa mga addict nga posibleng mogalgal kaniya sa maong bisyo.