EDITORYAL - Gun ban sa Comelec natapos na

Unya  na usab  kini  ipatuman  sa election  sa  barangay ug  sa SK  sa buwan  sa Oktobre.

Daghan  ang    nadakpan   atol  sa pagpatuman  sa  maong  balaod  diin  bug-at ang  napahamtang  nga  silot  kanila.

Apan  wala  na  maghunahuna  ang tawo  sa kabug-at  sa maong silot  kay  ang  mahinungdanon  kanila  mao  ang  pagsupak  sa  maong  balaod.

Ang importante kanila  mao  ang  kaanindot  nga  gamiton  sa ilang  armas   sa  pagpatay  sa ilang  kontra.

May  mga  tawo  man  gud  nga  inigkaliso  na  sa utok  gumikan  sa  gihingos  nga  drugas  ,  mosamot  na  ang  kaisug  ug   kadtong  iyang  gikaaway  di  niya  katulgan  kundi  niya  mapusilan.

Mas  kugihan  silang  mopatay  sa ilang  isig-katawo,  ug wa  na  nila huna-hunaa  ang  bug-at  usab  nga  silot nga  ilang  mahiagoman.

Tan-awa  karong   adunay  Comelec  gun ban,  misurender  na  ang  CPDRC  tungod  sa  naghinubra  nga  gidaghanon  sa  mga  piniriso  niini.

Bisan  ang  mga  prisohan  sa lungsod,  ang  uban puno  na  kaayo  ug  bisan  kun  giunsa  sa kapolisan  sa  pagpahigayon  og balaod  aron  mahadlok  ang  tawo, apan sa gihapon  misamot  na  hinuon kini  kaisug.

Nganong  ingon  niini  ang  dagan  sa hunahuna  sa tawo  karong  panahuna nga  unta  ang  tanan  nasayud  man sa kahagip-ot  kun  ikaw  mapriso.

Lahi  ang  pagbating  gawasnon  kay sa  piniriso  nga  usahay  ang  wa  nimo hiandi  sa  didto  pa ka  sa inyong  balay , masinatian  na  nimo  sa prisohan.

Nindot  unta kun  ang  makapapriso  kanimo  mao  ang  sala  nga wala  nimo  tuyoa  sa paghimo.

Sama  pananglit  kun  napriso  ka  tungod  kay  imong  gidepensahan  ang imong  kaugalingon  gikan  sa buot  unta mopatay  kanimo,  ug  sa laktud  ikaw  ang  nakapatay kaniya.

Kaanugon  sa  imong  trabaho, negosyo,  sakyanan, balay, guwapang asawa  ug uban  pang mga  butang  nga  ikaw  unta ang  angay nga  mopahimus  kun  gawasnon  pa ka.

Apan  tungod  kay ikaw  nakapatay  ug napriso,  kaanogon  baya  sa maayo  nimong  ugma,  diin  kasagaran  sa mapriso,  ang  asawa  mangita  gayud og makalipay  kaniya.

Kun  ang tawo  makakat-on lang  gyud  og pailub,  likayan ang  pagdala  og armas  nga  makapatay ilabi  na sa armas  de fuego, aw  di gyud  mapriso.