Igsuon gustong mobaligya sa iyang bahin sa yuta nga kabilin

Ang yuta o bisan unsang  property nga atong ma-inherit sa atong mga ginikanan makonsiderar na nga atong kaugalingon ug aduna ka na unya’y katungod sa pagpahimus o pagbaligya niini. Apan kun ang yuta wa pa mabahin-bahin sa mga igsuon, mamahimo ba ang uban nga makabaligya sa ilang share? Kana nga pangutana ang atong tubagon karon sa atong column.

Dear Atty. Divine

Aduna mi yuta nga kabilin sa among mga ginikanan apan wa pa mabahin-bahin ug wa pa sab mabalhin sa among pangan. Ang plano sa uban namong igsuon nga ilang ibaligya ang ilang share apan aduna say duha nako ka igsuon nga supak sa pagbaligya niini. Pagkakaron ang kita sa among yuta kay aduna may kalubihan among gibahin-bahin ngadto sa kaunom. Ang akong pangutana attorney kun makabaligya ba ang uban namo ka igsuon sa ilang share nga wa pa man mabalhin sa among pangan ug wa pa usab namo ma-partition ang among property? Unsa may angayan namong buhaton aron mabalhin kini sa among pangan? Daghang salamat Attorney sa imong pagtagad sa akong mga pangutana. — George

* * *

Dear George,

Sa  dihang namatay ang inyong mga ginikanan, kun wa sila’y gibilin nga Last Will and Testament, kamong unom ka igsuon automatic nga maoy mi-inherit sa ilang gibilin nga yuta. Matag usa kaninyo adunay katungod sa usa ka share o bahin niini. Isip mga co-owners kay wa pa man ninyo mabuak ang property natural entitled sab mo sa pagbahin sa kita or income sa maong yuta. Apan kun ang inyong ubang igsuon gusto na nga mobaligya sa ilang share, dili mo makapugong niini gawas lang kun kamo interesado sab nga mao na lang ang mopalit. Mamahimong makabaligya ang inyong igsuon apan kutob ra sa ilang share ug ang dokumento nga andamon ug pirmahan ninyo niana mao kanang Extra Judicial Partition with Sale sa igsuon nga gustong magbaligya sa iyang share. Kun gusto mo nga ma-transfer sa inyong pangan ang yuta sa inyong mga ginikanan, ang inyong buhaton mao ang pagpahimo og Extra Judicial Partition nga pirmahan ninyong unom ka magsuon ug panotaryuhan. Human niini, inyong isumiter ang maong dokumento ngadto sa Bureau of Internal Revenue kon BIR uban sa death certificate sa inyong mga ginikanan ug Certified True Copy sa Tax declaration aron sa pagbayad og Estate Tax. Kun aduna nay ipagawas nga Certificate Authorizing Registration kon CAR ang BIR, inyo kanang isumiter sa Assessor’s Office diin nahimutang ang inyong yuta alang sa pag-patransfer ngadto sa inyong pangan ug kun titulado kini moadto sab kamo sa Register of Deeds aron pagpabalhin sa pangan sa titulo sa maong property. Hinaut nga akong natubag ang imong mga pangutana. Daghang salamat ug God Bless. —  Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag adlawng Miyerkules ug Domingo.