Dili pa ulahi

Mao kini ang reaksiyon sa pipila sa mga residente sa Talisay, ilabi na ang mga manindahay sa Tabunok public market nga apektado sa pagbalhin nila ngadto sa barangay Lagtang.

Naninguha karon si Kongresista Eduardo Gullas nga mabalhin ang merkado gikan sa Lagtang paingon ngadto sa karaang merkado sa Tabunok.

Niadtong Sabado, nangunay si Ediegul sa pag-inspeksiyon sa karaang merkado sa Tabunok, uban nilang Engr. Gamaliel Vicente ug Engr. Ariel Araw-Araw.

Ikalipay kini dili lang sa mga manindahay kun dili lakip na sa mga drayber sa traysikol ug sa mga mamalitay nga naanad na sa Tabunok.

Tinuod man gyud nga nimingaw ang Lagtang, ug daghan sa mga nakapanag-iya og stalls ang nagyawyaw sa kawalay halin kay lagi ang mga tawo nga naanad sa Tabunok, nangita man og laing merkado nga kapalitan. Ang nabulahan ang Minglanilla public market, nga bisan sa kamahal sa mga baligya dinhi ilabi na ang isda, dugokon gihapon sa mga mamalitay nga dili ganahan moadto sa Lagtang.

Apan kun makabalhin na ang mga mamalitay, unsa man kahay buhaton nianang merkado sa Lagtang?

Hinuon naa man na, wala pa kita masayod sa kinaadman sa kongresista sa first district sa lalawigan sa Sugbo.

Kahinumdoman, si Ediegul gipilde ni Johnny “JVR” delos Reyes pagka-mayor sa Talisay. Ang tandem ni JVR (nga akong giilang Kuya Johnny sa Order of Eagles, uban ni Kuya Boy Odilao) mao si Atty. Romeo Villarante, ug pareho silang nakadaog.

Ang gipasanginlan sa mga tawo nga nakapilde sa beteranong politiko sa unang distrito mao ang hugot nga kampanya sa mga tricycle drivers sa Tabunok tungod sa ilang pagka-displaced sa pagbalhin sa merkado didto sa Lagtang.

Ang rason ni Ediegul pagbalhin sa merkado didto sa Lagtang mao ang sobrang kahuot sa trapiko sa Tabunok.

Tinuod man gyud nga “bottleneck” na sa trapiko ini’g entrada gyud sa merkado sa Tabunok, paingon sa taytayan sa Mananga.

Apan bisan nasayod si Ediegul nga makuhaan ang iyang botos tungod sa iyang pagpursiger nga matunhay ang dagan sa trapiko sa lungsod, wala niya kini panumbalinga. Iyang gilingkoran ang pagbalhin sa merkado ngadto sa Lagtang aron maluagluag ang trapiko sa Tabunok.

Kini man untang problema sa trapiko sa Tabunok masulbad man unta kini kun si Mayor Soc Fernandez ang motutok niini kay siya man unta ang amahan sa siyudad. Pero sa sobrang kabise niya og follow-up sa badlongon niyang anak nga si Joavan, wala gyud siya’y tarong nahimo sa Talisay.

* * *

Ning kalibutana, libre ang magdamgo

Apan kining pagdamgo ni Jun Pelaez nga nagkakusog siya sa Lapulapu tungod sa iyang boto nga nakuha sa miaging eleksiyon bisan napilde siya kang re-elected Mayor Paz Radaza, namura og salimoang sa usa ka hubog.

Kun tan-aw nimo iyang nakuha sa 2010 ug 2013, ang iyang botos namura og tubig sa kanal nga na-stagnat. Wala makadagayday.

Sa 2010, daghan ang midagan pagka-mayor, gawas niya ug kang Radaza. Pero, niadtong Mayo 13, 2013, one on one lamang sila.

Kun tiponon ang tanang botos sa 2010 ikomparar sa botos ni Pelaez sa 2013, murag parepareho ra. Unya, kining botos ni Pelaez nakuha niya kini bisan sa gipasangil sa pikas nga vote-buying. Adunay nakuhang mga litrato nga gipang-pose sa internet nga adunay nanghatag og tubig ug pagkaon sa eleksiyon unya ang gigamit nga sakyanan nga gikargahan na-trace nga iya.

Adunay estorya nga akong nadawat nga adunay nanglupad nga tag-P500 sa eleksiyon.

Pero ang kampo sa mga Radaza adunay campaign slogan nga "hoy kastila, sa daan na matuwid ang 500 'di namin kailangan". Kining propagandaha misaler. Sa laktod, wala diay vote buying does nga mosaler sa Lapulapu.

Ang botos sa vice mayor ug ni congresswoman-elect Aileen Radaza miabot og 108,000 samtang ang botos sa 119,000 nga adunay discrepancy nga 11,000 botos.

Kun aduna pay vote-buying, nganong nakadaog man ang mga alyado ni Mayor Paz, iyang tanang konsehal ug bise mayor? Ug ang botos ni first councilor Harry Don Radaza, kang Aileen ug sa bise mayor tupongtupong ra.

Ang mga kandidato pagka-konsehal ni Jun Pelaez layo kaayo og natagakan ug ang ika-13 adunay mga 11,000 botos nga deperensiya.

Ang discrepancy sa botos sa mayor nga 119,000 ikomparar sa bise mayor ug kongresista nga 108k.

Kun mao kini, wala ba kahay nahitabong “junking” sa kampo sa Liberal Party sa Lapulapu?

Sa balaod ra ba, basta adunay 10,000 nga “unexplained votes” ang kandidato mahimong kasohan og “electoral sabotage” unya non-bailable offense ra ba kini.

Unsaon kaha pagpasabot ngadto sa mga alyado ug sa mga tawo ang 11,000 nga unexplained votes?